7
¹ Pas këtyre Jezusi endej nëpër Galile, meqë Ai nuk donte të kalonte nëpër Jude, sepse judenjtë e kërkonin ta vrisnin.
² Po afrohej festa e judenjve, ajo e tabernakujve.
³ Prandaj vëllezërit e Tij i thanë: "Largohu prej këtej dhe shko në Jude, që t’i shohin edhe dishepujt e Tu punët që bën,
⁴ sepse askush nuk bën gjë në fshehtësi nëse kërkon të dalë hapur. Nëse Ti i bën këto gjëra, dil hapur para botës."
⁵ Sepse as vëllezërit e Tij nuk besonin në Të.
⁶ Atëherë Jezusi u tha: "Koha Ime nuk ka ardhur ende, por koha juaj është gjithmonë gati.
⁷ Bota nuk mund t’ju urrejë ju, por më urren Mua, sepse Unë dëshmoj kundër saj, që punët e saj janë të liga.
⁸ Ngjituni vetë në festë, Unë nuk po ngjitem në këtë festë, sepse koha Ime nuk është përmbushur ende."
⁹ Si tha këto gjëra, qëndroi në Galile.
¹⁰ Por kur vëllezërit e Tij u ngjitën për në festë, atëherë u ngjit edhe Ai, jo hapur, por në fshehtësi.
¹¹ Ndërkaq judenjtë e kërkonin në festë dhe thoshin: "Ku është Ai?"
¹² Midis turmave kishte shumë pëshpëritje për Të. Disa thoshin se ishte njeri i mirë; të tjerë thoshin të kundërtën, që Ai mashtronte turmën.
¹³ Megjithatë askush nuk fliste hapur për Të nga frika e judenjve.
¹⁴ Por, tani në mes të festës, Jezusi u ngjit në tempull dhe i mësonte njerëzit.
¹⁵ Atëherë judenjtë habiteshin, dhe thoshin: "Si i di ky njeri shkronjat pa mësuar?"
¹⁶ Atëherë Jezusi iu përgjigj dhe tha: "Mësimet e Mia nuk janë të Miat, por të Atij që më ka dërguar.
¹⁷ Nëse dikush dëshiron të bëjë vullnetin e Tij, ai do ta marrë vesh nëse këto mësime janë nga Perëndia, apo Unë flas nga vetja Ime.
¹⁸ Ai që flet nga vetja kërkon lavdinë e vet, por kush kërkon lavdinë e Atij që e ka dërguar Atë, Ai është i vërtetë dhe tek Ai nuk ka padrejtësi.
¹⁹ A nuk jua dha Moisiu Ligjin? Askush prej jush nuk e zbaton Ligjin. Përse kërkoni të më vrisni?"
²⁰ Turma u përgjigj: "Ti ke demon. Kush kërkon të të vrasë?"
²¹ Jezusi u përgjigj dhe u tha: "Një punë bëra dhe të gjithë jeni të mrekulluar.
²² Prandaj Moisiu ju ka dhënë rrethprerjen (jo se është nga Moisiu, por nga etërit) dhe ju e rrethprisni njeriun edhe të shtunën.
²³ Nëse një njeri rrethpritet të shtunën, që të mos shkelet Ligji i Moisiut, ju zemëroheni me Mua sepse shëndosha një njeri të tërë të shtunën?
²⁴ Mos gjykoni nga dukja, por gjykoni me drejtësi."
²⁵ Disa nga Jeruzalemi thoshin: "A nuk është ky ai që ata kërkojnë ta vrasin?
²⁶ Ja, ai po flet hapur, dhe asgjë nuk i thonë. Mos vallë e dinë për të vërtetë krerët që ky është Krishti?
²⁷ Por ne e dimë nga është ky. Kur të vijë Krishti, askush nuk do ta dijë se nga është."
²⁸ Pastaj Jezusi, ndërsa mësonte njerëzit në tempull, thirri dhe tha: "Edhe Mua më njihni dhe e dini nga jam. Unë nuk kam ardhur nga vetja Ime, por Ai që më ka dërguar është i vërtetë, të cilin ju nuk e njihni.
²⁹ Unë e njoh Atë, sepse prej Tij jam dhe Ai më ka dërguar."
³⁰ Prandaj ata kërkonin ta kapnin; por kurrkush nuk vuri dorë mbi Të, sepse nuk kishte ardhur ende ora e Tij.
³¹ Por shumë nga turma besuan tek Ai dhe thoshin: "Kur të vijë Krishti, a do të bëjë Ai më shumë mrekulli se ato që bëri Ky?"
³² Farizejtë dëgjuan turmën duke pëshpëritur këto gjëra për Të. Kryepriftërinjtë dhe farizejtë dërguan rojat që ta kapnin.
³³ Atëherë Jezusi tha: "Edhe për pak kohë jam me ju dhe do të shkoj tek Ai që më ka dërguar.
³⁴ Do të më kërkoni dhe nuk do të më gjeni, dhe aty ku do të jem Unë, ju nuk mund të vini."
³⁵ Judenjtë thanë me njëri-tjetrin: "Ku ka për të shkuar ky, që ne nuk do ta gjejmë? Mos do të shkojë në diasporën e grekëve dhe të mësojë grekët?
³⁶ Ç’është kjo fjalë që tha: ‘Do të më kërkoni dhe nuk do të më gjeni dhe atje ku do të jem Unë, ju nuk mund të vini’?"
³⁷ Në ditën e fundit, ditën e madhe të festës, Jezusi qëndroi dhe thirri, duke thënë: "Po të ketë etje njeri, le të vijë tek Unë dhe të pijë.
³⁸ Ai që beson në Mua, siç e ka thënë Shkrimi: ‘lumenj me ujë të gjallë do të rrjedhin nga brenda tij’."
³⁹ Por këtë Ai e tha për Frymën, që kishin për ta marrë ata që besonin në Të. Sepse Fryma nuk ishte dhënë ende, meqë Jezusi ende nuk e kishte marrë lavdinë.
⁴⁰ Prandaj disa prej turmës, duke dëgjuar këto fjalë, thoshin: "Ky është vërtet Profeti."
⁴¹ Të tjerë thoshin: "Ky është Krishti." Kurse disa të tjerë thoshin: "Mos vjen vallë Krishti nga Galileja?
⁴² A nuk është thënë në Shkrim, që Krishti vjen nga farë e Davidit dhe nga Betlehemi, fshati ku ishte Davidi?"
⁴³ Prandaj, për shkak të Tij, pati përçarje midis turmës.
⁴⁴ Disa prej tyre donin ta kapnin, por askush nuk vuri dorë mbi Të.
⁴⁵ Pastaj tek kryepriftërinjtë dhe farizejtë erdhën rojat. Ata u thanë: "Përse nuk e sollët?"
⁴⁶ Rojat u përgjigjën: "Kurrë nuk ka folur njeri kështu."
⁴⁷ Atëherë farizejtë iu përgjigjën: "Mos jeni mashtruar edhe ju?
⁴⁸ A ka besuar tek Ai ndonjë nga krerët ose nga farizejtë?
⁴⁹ Por kjo turmë që nuk e njeh Ligjin është e mallkuar."
⁵⁰ Nikodemi, që ishte një prej tyre dhe që kishte ardhur tek Ai më parë, u tha,
⁵¹ "A e dënon njeriun Ligji ynë, pa e dëgjuar më parë dhe pa ditur çfarë ka bërë?"
⁵² Ata u përgjigjën dhe i thanë: "Mos je edhe ti nga Galileja? Kërko dhe do të shikosh që nuk ka dalë profet nga Galileja."
⁵³ Dhe shkuan, secili në shtëpinë e vet.