21
¹ Pas këtyre ngjarjeve Jezusi iu shfaq përsëri dishepujve në detin e Tiberiadës dhe ja si u shfaq:
² ishin bashkë Simon Pjetri, Thomai i quajtur Binjaku, Natanaili nga Kana e Galilesë, ata të Zebedeut, dhe dy të tjerë prej dishepujve të Tij.
³ Simon Pjetri u tha: "Po shkoj të zë peshq." Ata i thanë: "Po vijmë edhe ne me ty." Dolën dhe hipën në lundër. Atë natë, nuk zunë asgjë.
⁴ Por me të zbardhur dita, Jezusi u shfaq në breg; megjithatë dishepujt nuk e morën vesh që ishte Jezusi.
⁵ Jezusi atëherë u tha: "Djema, mos keni ndonjë peshk?" Ata iu përgjigjën: "Jo."
⁶ Ai u tha: "Hidheni rrjetën në anën e djathtë të lundrës dhe do të gjeni." Atëherë ata e hodhën rrjetën dhe nuk ishin më në gjendje ta tërhiqnin prej sasisë së madhe të peshqve.
⁷ Pastaj dishepulli, të cilin Jezusi e donte, i tha Pjetrit: "Është Zoti." Atëherë Simon Pjetri, kur dëgjoi se Ai ishte Zoti, hodhi përsipër rrobën, sepse ishte i zhveshur, dhe u hodh në det.
⁸ Dishepujt e tjerë erdhën me një lundër të vogël, sepse nuk ishin larg nga toka, rreth dyqind kute, duke tërhequr rrjetën me peshq.
⁹ Pastaj kur zbritën në tokë, panë një zjarr me thëngjij, që ndodhej aty, dhe një peshk të vënë mbi të dhe bukë.
¹⁰ Jezusi u tha: "Sillni nga peshqit që sapo zutë."
¹¹ Atëherë Simon Pjetri u ngjit dhe e nxori rrjetën në tokë plot me peshq të mëdhenj, njëqind e pesëdhjetë e tre; megjithëse ishin kaq shumë, rrjeta nuk u ça.
¹² Jezusi u tha: "Ejani të hani mëngjes." Asnjë prej dishepujve nuk guxonte ta pyeste: "Kush je Ti?", duke e ditur që ishte Zoti.
¹³ Atëherë Jezusi u afrua, mori bukën dhe ua dha atyre, edhe peshkun po ashtu.
¹⁴ Kjo ishte tashmë e treta herë që Jezusi iu shfaq dishepujve pasi u ngjall prej të vdekurve.
¹⁵ Pastaj si hëngrën mëngjesin, Jezusi i tha Simon Pjetrit: "O Simon i Gjonit, a më do më shumë se këta?" Ai i tha: "Po, Zot; Ti e di që të dua." Ai i tha: "Kulloti qengjat e Mi."
¹⁶ I tha përsëri për herë të dytë: "O Simon i Gjonit, a më do Mua?" Ai i tha: "Po, Zot, Ti e di që të dua." Ai i tha: "Ruaji dhentë e Mia."
¹⁷ I tha për herë të tretë: "O Simon i Gjonit, a më do Mua?" Pjetri u trishtua sepse Ai i tha për të tretën herë: ‘A më do?’ dhe i tha: "Zot, Ti i di të gjitha. Ti e di që të dua." Jezusi i tha: "Kulloti dhentë e Mia.
¹⁸ Me të vërtetë, me të vërtetë po të them që, kur ishe më i ri, ngjisheshe dhe shkoje ku të doje. Por kur të plakesh, do të shtrish duart dhe një tjetër do të të veshë e të ngjeshë dhe do të të shpjerë atje ku nuk do."
¹⁹ E tha këtë, duke lënë të kuptohej me ç’lloj vdekjeje do t’i jepte lavdi Perëndisë. Pasi tha këtë, shtoi: "Më ndiq."
²⁰ Pjetri u kthye dhe pa dishepullin, që e donte Jezusi, duke i shkuar pas, ai i cili gjatë darkës ishte mbështetur në kraharorin e Tij dhe kishte thënë: "Zot, kush është ai që po të tradhton?"
²¹ Pjetri pra, kur e pa këtë, i tha Jezusit: "Zot, ç’do të bëhet me këtë?"
²² Jezusi iu përgjigj: "Po të dua që ai të qëndrojë derisa të vij Unë, ç’ke ti? Ti më ndiq Mua."
²³ Prandaj midis vëllezërve u përhap fjala që ai dishepull nuk do të vdiste. Por Jezusi nuk i kishte thënë që ai nuk do të vdiste, por "po të dua që ai të qëndrojë derisa të vij Unë [ç’ke ti]?"
²⁴ Ky është dishepulli që dëshmon për këto dhe që i ka shkruar këto gjëra. Ne e dimë që dëshmia e tij është e vërtetë.
²⁵ Ka edhe gjëra të tjera që bëri Jezusi, të cilat po të shkruheshin një nga një, mendoj që as bota vetë nuk do të mjaftonte për të mbajtur librat që duheshin shkruar.