kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21

Gjoni

^1
1 Në fillim ishte Fjala dhe Fjala ishte me Perëndinë dhe Fjala ishte Perëndi.
² Ky ishte në fillim me Perëndinë.
³ Të gjitha u bënë nëpërmjet Tij dhe pa Të nuk u bë asnjë gjë, që është bërë.
⁴ Në Të ishte jeta dhe jeta ishte drita e njerëzve.
⁵ Drita shndrit në errësirë dhe errësira nuk e mposhti.
⁶ Ishte një njeri i dërguar nga Perëndia, që e kishte emrin Gjon.
⁷ Ky erdhi për dëshmim, për të dëshmuar për dritën, që të gjithë të mund të besonin nëpërmjet tij.
⁸ Ai nuk ishte drita, por u dërgua që të dëshmonte për dritën.
⁹ Drita e vërtetë, që ndriçon çdo njeri, po vinte në botë.
¹⁰ Ishte në botë dhe bota u bë prej Tij, por bota nuk e njohu.
¹¹ Erdhi tek të vetët dhe të vetët nuk e pranuan.
¹² Por ata që e pranuan, atyre Ai u dha pushtet të bëhen bij të Perëndisë, atyre që besojnë në emrin e Tij,
¹³ të cilët nuk lindën prej gjaku, as prej vullnetit të mishit, as prej vullnetit të njeriut, por nga Perëndia.
¹⁴ Fjala u bë mish dhe banoi ndër ne dhe ne e pamë lavdinë e Tij, lavdi si ajo e të vetëmlindurit prej Atit, plot hir e vërtetësi.
¹⁵ Gjoni dëshmoi për Të dhe bërtiti, duke thënë: "Ky ishte Ai për të cilin thashë: ‘Ai që vjen pas meje është mbi mua, sepse ishte përpara meje.’"
¹⁶ Sepse prej plotësisë së Tij morëm ne të gjithë hir mbi hir.
¹⁷ Sepse Ligji u dha nëpërmjet Moisiut, ndërsa hiri dhe e vërteta erdhën nëpërmjet Jezus Krishtit.
¹⁸ Askush nuk e ka parë ndonjëherë Perëndinë; i vetëmlinduri Perëndi, që është në gjirin e Atit, Ai e ka bërë të njohur.
¹⁹ Kjo është dëshmia e Gjonit, kur judenjtë nga Jeruzalemi i dërguan priftërinj dhe levitë për ta pyetur: "Kush je ti?"
²⁰ Ai rrëfeu e nuk mohoi; dhe pranoi: "Unë nuk jam Krishti."
²¹ Ata e pyetën: "Çfarë je atëherë? A je ti Elia?" Ai tha: "Nuk jam." "A je ti profeti?" Ai u përgjigj: "Jo."
²² Atëherë ata i thanë: "Ti kush je? Që t’u japim përgjigje atyre që na dërguan. Ç’thua ti për veten tënde?"
²³ Ai tha: "Unë jam zëri i atij që thërret në shkretëtirë: ‘Drejtoni rrugën e Zotit’, siç tha profeti Isaia."
²⁴ Ata ishin dërguar nga farizenjtë.
²⁵ E pyetën dhe i thanë: "Atëherë përse pagëzon, nëse ti nuk je Krishti, as Elia, as Profeti?"
²⁶ Gjoni iu përgjigj dhe tha: "Unë pagëzoj me ujë, por midis jush qëndron Ai që ju nuk e njihni.
²⁷ Është Ai që vjen pas meje, gjalmet e sandaleve të të cilit unë nuk jam i denjë t’i zgjidh."
²⁸ Këto gjëra ndodhën në Betani përtej Jordanit, ku Gjoni ishte duke pagëzuar.
²⁹ Të nesërmen ai pa Jezusin duke ardhur drejt tij dhe tha: "Ja, qengji i Perëndisë që heq mëkatin e botës.
³⁰ Ky është Ai për të cilin thashë unë: ‘Pas meje vjen një njeri i cili është mbi mua, sepse ishte para meje.’
³¹ Unë nuk e njihja; prandaj erdha duke pagëzuar me ujë, që Ai t’i shfaqet Izraelit."
³² Gjoni dëshmoi, duke thënë: "E pashë Frymën që zbriti si një pëllumb prej qiellit dhe qëndroi mbi Të.
³³ Unë nuk e njihja, por Ai që më dërgoi për të pagëzuar me ujë, më tha: ‘Ai mbi të cilin do të shohësh Frymën të zbresë e të qëndrojë mbi Të, ky është Ai që pagëzon me Frymën e Shenjtë.’
³⁴ Unë e pashë dhe dëshmova që ky është Biri i Perëndisë."
³⁵ Gjoni qëndroi edhe të nesërmen bashkë me dy prej dishepujve të tij.
³⁶ Duke vështruar Jezusin tek po shkonte, ai tha: "Ja Qengji i Perëndisë!"
³⁷ Të dy dishepujt e tij e dëgjuan kur po fliste dhe i shkuan Jezusit pas.
³⁸ Jezusi u kthye dhe, kur i pa ata duke i vajtur pas, u tha: "Çfarë kërkoni?" Ata i thanë: "Rabbi (që e përkthyer do të thotë Mjeshtër), ku rri Ti?"
³⁹ Ai u tha: "Ejani e shikoni." Atëherë ata shkuan dhe panë se ku rrinte dhe atë ditë qëndruan me Të; ishte rreth orës së dhjetë.
⁴⁰ Njëri prej të dyve që e kishin dëgjuar këtë prej Gjonit dhe që i shkuan Atij pas, ishte Andrea, vëllai i Simon Pjetrit.
⁴¹ Së pari, ky gjeti vëllanë e vet, Simonin, dhe i tha: "Kemi gjetur Mesinë, (që, e përkthyer, do të thotë Krishti").
⁴² Ai e çoi tek Jezusi. Jezusi, me ta parë, tha: "Ti je Simoni, biri i Gjonit; ti do të quhesh Kefa" (që përkthehet ‘Pjetër’).
⁴³ Të nesërmen Jezusi deshi të shkonte në Galile. Gjeti Filipin dhe i tha: "Më ndiq."
⁴⁴ Filipi ishte nga Betsaida, nga qyteti i Andreas dhe i Pjetrit.
⁴⁵ Filipi gjeti Natanailin dhe i tha: "Kemi gjetur Atë për të cilin shkroi Moisiu në Ligj si edhe profetët, Jezusin e Nazaretit, birin e Jozefit."
⁴⁶ Natanaili i tha: "A mund të dalë ndonjë e mirë nga Nazareti?" Filipi i tha: "Eja e shiko".
⁴⁷ Jezusi e pa Natanailin që po vinte tek Ai dhe tha për të: "Ja vërtet një izraelit, tek i cili nuk ka mashtrim!"
⁴⁸ Natanaili i tha: "Nga më njeh Ti mua?" Jezusi u përgjigj e i tha: "Të pashë, kur ishe nën fik, përpara se të thërriste Filipi."
⁴⁹ Natanaili iu përgjigj: "Rabbi, Ti je Biri i Perëndisë. Ti je Mbreti i Izraelit."
⁵⁰ Jezusi u përgjigj dhe i tha: "Ti besove, ngaqë të thashë, se të pashë nën fik? Gjëra më të mëdha se këto do të shohësh"
⁵¹ dhe i tha: "Me të vërtetë, me të vërtetë po ju them, do të shihni qiellin të hapur dhe engjëjt e Perëndisë duke u ngjitur e duke zbritur mbi Birin e Njeriut".