2
¹ Ditën e tretë u bë një dasmë në Kanë të Galilesë; nëna e Jezusit ishte atje.
² Edhe Jezusi me dishepujt e Tij u thirrën në dasmë.
³ Kur u mbarua vera, nëna e Jezusit i tha Atij: "Nuk kanë verë."
⁴ Jezusi i tha: "Ç’punë kam Unë me ty, o grua? Ora Ime nuk ka ardhur ende."
⁵ E ëma e Tij u tha shërbëtorëve: "Bëni çfarëdo që t’ju thotë."
⁶ Aty ishin gjashtë shtamba uji prej guri, që ishin vënë për pastrimin, sipas zakonit të judenjve, secila merrte dy ose tri masa.
⁷ Jezusi u tha: "Mbushni shtambat me ujë." Ata i mbushën deri në buzë.
⁸ Ai u tha: "Nxirrini tani dhe çojani të parit të gostisë." Ata ia çuan.
⁹ Kur i pari i gostisë e provoi ujin të kthyer në verë, nuk e dinte nga vinte (kurse shërbëtorët, që nxorën ujin, e dinin). I pari i gostisë thirri dhëndrin
¹⁰ dhe i tha: "Kushdo më parë shtron verën e mirë dhe, kur të ftuarit të jenë të pirë, atë të keqen. Ndërsa ti e ke ruajtur verën e mirë deri tani."
¹¹ Kjo ishte shenja e parë që bëri Jezusi në Kanë të Galilesë. Ai shfaqi lavdinë e Vet dhe dishepujt e Tij besuan në Të.
¹² Pas kësaj Ai, e ëma, vëllezërit dhe dishepujt e Tij zbritën në Kapernaum dhe qëndruan aty disa ditë.
¹³ Pashkët e judenjve ishin pranë dhe Jezusi u ngjit për në Jeruzalem.
¹⁴ Gjeti në tempull njerëz që shisnin qe, dhen dhe pëllumba, si dhe këmbyesit e parave duke ndenjur.
¹⁵ Pasi bëri një kamzhik prej thuprash, i përzuri të gjithë prej tempullit, edhe dhentë e qetë, ua derdhi paratë këmbyesve dhe ua përmbysi tryezat.
¹⁶ Atyre që shisnin pëllumba u tha: "Hiqini këto gjëra prej këtej. Mos e ktheni në pazar shtëpinë e Atit tim."
¹⁷ Dishepujve të Tij iu kujtua që ishte shkruar: ‘Zelli i shtëpisë Tënde do të më përpijë’.
¹⁸ Atëherë judenjtë u përgjigjën dhe i thanë: "Ç’shenjë na tregon që i bën këto gjëra?"
¹⁹ Jezusi u përgjigj dhe u tha: "Shkatërrojeni këtë tempull dhe do ta ngre përsëri në tri ditë."
²⁰ Pastaj judenjtë thanë: "Ky tempull u ndërtua në dyzet e gjashtë vjet dhe Ti dashke ta ngresh në tri ditë?"
²¹ Por Ai po fliste për tempullin e trupit të Vet.
²² Kur u ngjall prej të vdekurve, dishepujve të Tij iu kujtua që Ai e kishte thënë këtë dhe i besuan Shkrimit dhe fjalës që kishte thënë Jezusi.
²³ Tani që Ai ishte në Jeruzalem për Pashkët, në ditë feste, shumë veta, duke parë shenjat që bënte Ai, besuan në emrin e Tij.
²⁴ Por vetë Jezusi nuk u zinte besë atyre, sepse i njihte të gjithë
²⁵ dhe sepse nuk kishte nevojë që t’i dëshmonte ndokush për njeri, sepse Ai e dinte çfarë kishte brenda njeriut.