19
¹ Pastaj Pilati e çoi Jezusin që ta fshikullonin me kamxhik.
² Ushtarët thurën një kurorë ferrash, ia vunë në kokë dhe i hodhën përsipër një rrobe të purpurt.
³ I afroheshin dhe thoshin: "Përshëndetje o Mbret i judenjve" dhe i binin me shuplaka.
⁴ Pilati doli përsëri jashtë dhe u tha: "Ja, po jua sjell jashtë, që ta dini që nuk gjej asnjë faj në Të."
⁵ Pastaj Jezusi doli jashtë, duke mbajtur kurorën prej ferrash dhe rrobën e purpurt. Pilati u tha: "Ja njeriu!"
⁶ Kur e panë kryepriftërinjtë dhe shërbëtorët, bërtitën, duke thënë: "Kryqëzoje! Kryqëzoje!" Pilati u tha: "Merreni ju dhe kryqëzojeni, sepse unë nuk gjej faj në Të.
⁷ Judenjtë iu përgjigjën: "Ne kemi një ligj dhe sipas ligjit Ai duhet të vdesë, sepse e ka bërë Veten Bir të Perëndisë."
⁸ Kur Pilati e dëgjoi këtë fjalë, u frikësua edhe më shumë.
⁹ Hyri përsëri në godinën e guvernatorit dhe i tha Jezusit: "Nga je Ti?" Por Jezusi nuk i dha përgjigje.
¹⁰ Atëherë Pilati i tha: "Mua nuk më flet? Nuk e di që kam pushtet të të liroj dhe pushtet të të kryqëzoj?"
¹¹ Jezusi iu përgjigj: "Nuk ke pushtet mbi Mua, veç po të jetë dhënë nga lart. Prandaj ai që më dorëzoi te ti ka mëkatin më të madh."
¹² Prej kësaj kohe Pilati po përpiqej ta lironte, por judenjtë bërtitën duke thënë: "Po ta lirosh këtë, nuk je mik i Cezarit. Kush e bën veten mbret, i kundërvihet Cezarit."
¹³ Pilati, me të dëgjuar këto fjalë, e nxori Jezusin jashtë dhe u ul në fronin e gjyqit, në një vend që quhet Kalldrëm, por në hebraisht i thonë, Gabata.
¹⁴ Ishte përgatitja e Pashkëve, rreth orës së gjashtë. Pilati u tha judenjve: "Ja, mbreti juaj!"
¹⁵ Atëherë ata bërtitën: "Hiqe, hiqe! Kryqëzoje!" Pilati u tha: "Mbretin tuaj të kryqëzoj?" Kryepriftërinjtë u përgjigjën: "Nuk kemi mbret tjetër veç Cezarit."
¹⁶ Atëherë ai ua dorëzoi atyre që të kryqëzohej. Ata e morën Jezusin dhe Ai,
¹⁷ duke mbajtur Vetë kryqin, doli në një vend që quhet i Kafkës, që në hebraisht i thonë Golgotë.
¹⁸ Aty e kryqëzuan me dy të tjerë, njërin në një anë e tjetrin në anën tjetër dhe Jezusin në mes.
¹⁹ Pilati hartoi edhe një mbishkrim dhe e vuri mbi kryq. Ishte shkruar, JEZUS NAZARETASI, MBRETI I JUDENJVE.
²⁰ Shumë nga judenjtë e lexuan këtë mbishkrim, sepse vendi ku u kryqëzua Jezusi ishte pranë qytetit. Ishte shkruar në hebraisht, latinisht dhe greqisht.
²¹ Atëherë kryepriftërinjtë e judenjve i thanë Pilatit: "Mos shkruaj ‘Mbreti i judenjve’, por që Ai ka thënë: ‘Jam Mbret i judenjve’.
²² Pilati u përgjigj: "Ç’kam shkruar, e kam shkruar."
²³ Pastaj ushtarët, kur e kryqëzuan Jezusin, ia morën rrobat dhe i ndanë në katër pjesë, secilit ushtar një pjesë, si edhe tunikën. Tunika ishte pa qepje, e tëra e endur që në krye një cope.
²⁴ Atëherë ata thanë me njëri-tjetrin: "Mos e grisim, por ta hedhim në short e të shohim kush do ta marrë", që të përmbushej Shkrimi [që thotë]: "I ndanë rrobet e Mia midis tyre dhe veshjen Time e hodhën në short." Këto pra, bënë ushtarët.
²⁵ Pranë kryqit të Jezusit qëndronte e ëma e Tij dhe motra e saj, Maria gruaja e Kleopas dhe Maria Magdalena.
²⁶ Jezusi pra, duke parë nënën e Vet dhe dishepullin, të cilin e donte, duke qëndruar aty pranë, i tha nënës: "O grua, ja yt bir!"
²⁷ Pastaj i tha dishepullit: "Ja nëna jote!" Dhe që nga ajo orë, dishepulli e mori atë në shtëpinë e vet.
²⁸ Pas kësaj, Jezusi duke e ditur që tashmë të gjitha ishin kryer, që të përmbushej Shkrimi, tha: "Kam etje."
²⁹ Aty gjendej një enë plot me uthull. Kështu ata vunë në një degë hisopi një sfungjer plot me uthull dhe ia afruan te goja.
³⁰ Kur mori uthullën, Jezusi tha: "Gjithçka u krye." Përkuli kokën e dha shpirt.
³¹ Atëherë judenjtë, meqenëse ishte dita e Përgatitjes, që trupat të mos mbeteshin në kryq të shtunën, sepse ajo e shtunë ishte ditë e madhe, i kërkuan Pilatit që t’u thyeshin kërcinjtë e këmbëve dhe të hiqeshin prej aty.
³² Kështu erdhën ushtarët dhe thyen këmbët e të parit dhe të atij tjetrit që ishte kryqëzuar bashkë me Të.
³³ Kur erdhën tek Jezusi dhe panë që Ai tashmë kishte vdekur, nuk ia thyen këmbët.
³⁴ Por një nga ushtarët ia shpoi brinjën me heshtën e vet dhe menjëherë doli gjak dhe ujë.
³⁵ Ai që e ka parë ka dëshmuar, dhe dëshmia e tij është e vërtetë. Ai e di që thotë të vërtetën, që të besoni edhe ju.
³⁶ Sepse këto ndodhën që të përmbushej Shkrimi: ‘Nuk do t’i thyhet asnjë kockë’.
³⁷ Përsëri një tjetër Shkrim thotë: ‘Do t’i kthejnë sytë nga Ai që shpuan’.
³⁸ Pas këtyre ngjarjeve Jozefi nga Arimateja, që ishte një dishepull i Jezusit, por fshehtas nga frika e judenjve, i kërkoi Pilatit që ta hiqte trupin e Jezusit dhe Pilati e lejoi. Atëherë ai shkoi dhe e hoqi trupin e Tij.
³⁹ Shkoi edhe Nikodemi, ai që kishte shkuar tek Ai më parë natën dhe solli një përzierje mirre dhe aloeje, rreth njëqind libra.
⁴⁰ Atëherë ata morën trupin e Jezusit dhe e mbështollën në pëlhura liri me erëzat e mira, siç është zakoni i varrimit tek judenjtë.
⁴¹ Në vendin ku e kryqëzuan ishte një kopsht dhe në kopsht një varr i ri në të cilin askush nuk ishte vënë ndonjëherë.
⁴² Atje pra, e vunë Jezusin meqë ishte dita e Përgatitjes për judenjtë dhe meqë ai varr ishte afër.