18
¹ Si tha këto, Jezusi doli bashkë me dishepujt e Vet përtej përroit të Kedronit, ku ishte një kopsht, në të cilin hyri Ai dhe dishepujt e Tij.
² Edhe Juda, ai që do ta tradhtonte, e dinte atë vend, sepse shpeshherë Jezusi mblidhej atje bashkë me dishepujt e Vet.
³ Atëherë Juda, pasi mori një kompani ushtarësh si dhe disa roja prej kryepriftërinjve e prej farizejve, shkoi atje me fenerë, pishtarë dhe armë.
⁴ Jezusi, duke i ditur të gjitha gjërat që do t’i ndodhnin, doli përpara dhe u tha: "Kë kërkoni?"
⁵ Ata iu përgjigjën: "Jezus nazaretasin." Ai u tha: "Unë jam." Juda, ai që po e tradhtonte, ishte bashkë me ta.
⁶ Por kur Ai u tha: ‘Unë jam Ai’, ata u sprapsën dhe ranë përdhe.
⁷ Atëherë Ai i pyeti përsëri: "Kë kërkoni?" Ata thanë: "Jezus nazaretasin."
⁸ Jezusi u përgjigj: "Jua thashë që Unë jam Ai. Pra, nëse më kërkoni Mua, lërini këta të shkojnë",
⁹ që të përmbushej fjala që tha: ‘Nuk humba asnjë prej atyre që më dhe.’
¹⁰ Atëherë Simon Pjetri që kishte një shpatë, e nxori dhe e goditi shërbëtorin e kryepriftit, duke i këputur veshin e djathtë; shërbëtorin e quanin Malk.
¹¹ Por Jezusi i tha Pjetrit: "Fute shpatën në mill. Si të mos e pi kupën që më ka dhënë Ati?"
¹² Atëherë ushtarët, kapiteni dhe rojat e judenjve e kapën Jezusin dhe e lidhën.
¹³ Më parë e çuan tek Ana, sepse ai ishte vjehrri i Kaifës, që ishte kryeprift i atij viti.
¹⁴ Kaifa ishte ai që kishte këshilluar judenjtë, se ishte më mirë të vdiste një njeri për popullin.
¹⁵ Simon Pjetri dhe një dishepull tjetër i shkonin pas Jezusit; ai dishepull ishte i njohur i kryepriftit dhe hyri bashkë me Jezusin në oborrin e kryepriftit.
¹⁶ Por Pjetri qëndroi jashtë te dera. Pastaj doli dishepulli tjetër, i njohuri i kryepriftit, foli me derëtaren dhe e futi Pjetrin brenda.
¹⁷ Pastaj shërbëtorja, derëtarja, i tha Pjetrit: "A nuk je edhe ti nga dishepujt e këtij njeriu?" Ai tha: "Nuk jam."
¹⁸ Shërbëtorët dhe rojat kishin bërë një zjarr, po rrinin atje dhe po ngroheshin, sepse bënte ftohtë. Edhe Pjetri po rrinte me ta dhe po ngrohej.
¹⁹ Atëherë kryeprifti e pyeti Jezusin për dishepujt e Tij dhe për mësimin që jepte.
²⁰ Jezusi iu përgjigj: "Unë i kam folur hapur botës. Unë gjithmonë i kam mësuar njerëzit në sinagogë dhe në tempull, ku mblidhen të gjithë judenjtë dhe nuk kam folur asgjë fshehtas.
²¹ Përse më pyet Mua? Pyet ata që dëgjuan çfarë u kam thënë. Ja, këta i dinë ato që thashë Unë."
²² Kur tha këto, një nga rojat që po rrinte aty, i ra një shuplakë Jezusit dhe tha: "Kështu i përgjigjesh kryepriftit?"
²³ Jezusi iu përgjigj: "Në qoftë se fola keq, dëshmo për të keqen, por nëse fola mirë, përse më qëllon?"
²⁴ Atëherë Ana e dërgoi të lidhur te Kaifa, kryeprifti.
²⁵ Simon Pjetri po rrinte aty dhe po ngrohej. Ata pra, i thanë: "Mos je edhe ti prej dishepujve të Tij?" Ai mohoi dhe tha: "Nuk jam."
²⁶ Një nga shërbëtorët e kryepriftit, farefis i atij të cilit Pjetri i këputi veshin, tha: "A nuk të pashë unë ty në kopsht me Të?"
²⁷ Përsëri pra, Pjetri e mohoi dhe në atë çast këndoi këndezi.
²⁸ Pastaj ata e çuan Jezusin nga Kaifa në godinën e guvernatorit. Ishte mëngjes herët dhe ata nuk kishin hyrë në godinën e guvernatorit, që të mos ndoteshin, por të hanin Pashkët.
²⁹ Atëherë, Pilati doli jashtë tek ata dhe tha: "Çfarë padie sillni kundër këtij njeriu?"
³⁰ Ata u përgjigjën dhe i thanë: "Po të mos kishte bërë të këqija Ky, nuk do të ta dorëzonim ty."
³¹ Pastaj Pilati u tha: "Merreni ju dhe gjykojeni sipas ligjit tuaj." Judenjtë iu përgjigjën: "Neve nuk na lejohet të vrasim askënd,"
³² që të përmbushej fjala që tha Jezusi, kur tregoi se nga ç’lloj vdekjeje do të vdiste.
³³ Atëherë Pilati hyri përsëri në godinën e guvernatorit, thirri Jezusin dhe i tha: "A je Ti Mbreti i judenjve?"
³⁴ Jezusi u përgjigj: "Prej vetes tënde po e thua këtë, apo ta kanë thënë të tjerët për Mua?"
³⁵ Pilati u përgjigj: "Mos jam unë jude? Kombi yt dhe kryepriftërinjtë të dorëzuan tek unë. Çfarë ke bërë?"
³⁶ Jezusi u përgjigj: "Mbretëria Ime nuk është prej kësaj bote. Po të ishte mbretëria Ime prej kësaj bote, shërbëtorët e Mi do të luftonin që të mos u dorëzohesha judenjve. Por tani mbretëria Ime nuk është prej këtej."
³⁷ Atëherë Pilati i tha: "Pra, Ti je mbret?" Jezusi u përgjigj: "Ti po thua që jam mbret. Unë për këtë kam lindur dhe për këtë kam ardhur në botë, që të dëshmoj të vërtetën. Kushdo që është prej së vërtetës, dëgjon zërin Tim."
³⁸ Pilati i tha: "Ç’është e vërteta?" Si e tha këtë, doli përsëri tek judenjtë dhe u tha atyre: "Unë nuk gjej asnjë faj në Të.
³⁹ Por midis jush është një zakon, që t’ju lëroj një për Pashkët. Pra, a doni ju t’ju liroj Mbretin e judenjve?"
⁴⁰ Atëherë ata bërtitën përsëri, duke thënë: "Jo këtë por Barabanë." Barabai ishte një kusar.