17
¹ Këto foli Jezusi dhe, pasi ngriti sytë në qiell, tha: "O Atë! Ka ardhur ora, jepi lavdi Birin Tënd, që Biri të japë lavdi Ty,
² ashtu siç i dhe pushtet mbi çdo mish, që Ai t’u japë jetë të amshuar të gjithë atyre që Ti u ke dhënë.
³ Kjo është jeta e amshuar, që ata të njohin Ty, Perëndinë e vetëm të vërtetë dhe Jezus Krishtin, të cilin ke dërguar.
⁴ Unë të dhashë lavdi mbi tokë, duke kryer punën që më dhe për ta bërë.
⁵ Dhe tani, më jep lavdi o Atë, pranë vetes Tënde, me lavdinë, të cilën e kisha me Ty para se të ishte bota.
⁶ U tregova emrin Tënd njerëzve që më dhe nga bota; ishin të Tutë dhe m’i dhe Mua; fjalën Tënde e kanë mbajtur.
⁷ Tani e kanë marrë vesh se gjithë sa më ke dhënë janë prej Teje.
⁸ Sepse fjalët që më dhe ua kam dhënë atyre. Ata i pranuan dhe e morën vesh vërtet që kam dalë prej Teje dhe besuan që Ti më ke dërguar.
⁹ Unë lutem për ta. Nuk lutem për botën, por për ata që më ke dhënë, sepse janë të Tutë.
¹⁰ Të gjitha gjërat e Mia janë të Tuat dhe të Tuat janë të Miat dhe kam marrë lavdi në to.
¹¹ Tani Unë nuk jam më në botë, por ata vetë janë në botë dhe Unë po vij te Ti. Atë i shenjtë, ruaji ata në emrin Tënd, që më ke dhënë, që të jenë një, siç jemi ne.
¹² Kur isha me ta i ruaja në emrin Tënd, emrin që më ke dhënë. I ruajta, dhe asnjë prej tyre nuk humbi, përveç Birit të humbjes, që të përmbushej Shkrimi.
¹³ Tani po vij tek Ti. I flas këto në botë, që ata të kenë në vetvete gëzimin Tim të plotë.
¹⁴ Unë u kam dhënë fjalën Tënde. Bota i ka urryer, sepse ata nuk janë nga bota, ashtu si edhe Unë nuk jam nga bota.
¹⁵ Nuk po lutem që t’i heqësh nga bota, por që t’i ruash prej të ligut.
¹⁶ Ata nuk janë nga bota, ashtu si edhe Unë nuk jam nga bota.
¹⁷ Shenjtëroji ata me të vërtetën. Fjala Jote është e vërteta.
¹⁸ Siç më dërgove Mua në botë, edhe Unë i dërgova ata në botë.
¹⁹ Për ata po shenjtëroj [Unë] veten Time, që edhe ata të jenë të shenjtëruar në të vërtetën.
²⁰ Nuk lutem vetëm për këta, por edhe për ata që besojnë në Mua përmes fjalës së tyre,
²¹ që të gjithë të jenë një, ashtu si je Ti, o Atë, tek Unë dhe Unë te Ti, që edhe ata të jenë te ne, që bota të besojë që Ti më ke dërguar.
²² Unë, lavdinë që më ke dhënë Mua, ua kam dhënë atyre, që të jenë një, siç jemi ne një,
²³ Unë në ta dhe Ti në Mua, që të jenë të përkryer në një, që bota ta marrë vesh që Ti më ke dërguar dhe i ke dashur ata, siç më ke dashur Mua.
²⁴ O Atë, dua që edhe ata, që më ke dhënë, të jenë me Mua ku jam Unë, që të shohin lavdinë Time që më ke dhënë, sepse më deshe përpara themelimit të botës.
²⁵ O Atë i drejtë, bota nuk të ka njohur, por Unë të kam njohur dhe këta e kanë marrë vesh që Ti më ke dërguar.
²⁶ Ua bëra të njohur emrin Tënd dhe do t’ua bëj të ditur, që dashuria me të cilën më ke dashur të jetë ndër ta dhe Unë në ta."