16
¹ "Jua thashë këto gjëra, që të mos shkandulloheni.
² Ata do t’ju përjashtojnë nga sinagogat. Por po vjen ora, që kush ju vret ju do të kujtojë se po i bën shërbim Perëndisë.
³ Do t’i bëjnë këto gjëra, sepse nuk e kanë njohur Atin, as Mua.
⁴ Por këto jua kam thënë, që kur të vijë ora e tyre, t’i kujtoni ato që ju kam thënë Unë. Këto nuk jua thashë që në fillim, sepse isha me ju.
⁵ Por tani po shkoj tek Ai që më ka dërguar dhe askush prej jush nuk më pyet: ‘Ku shkon?’
⁶ Por, ngaqë jua kam thënë këto, hidhërimi ka mbushur zemrën tuaj.
⁷ Por Unë po ju them të vërtetën, më mirë është për ju që Unë të largohem, sepse po të mos largohem, Ngushëlluesi nuk do të vijë te ju. Por po të shkoj, do t’jua dërgoj.
⁸ Ai, kur të vijë, do ta fajësojë botën për mëkat, për drejtësi dhe për gjykim;
⁹ për mëkat, sepse nuk besojnë në Mua;
¹⁰ për drejtësi, sepse po shkoj tek Ati dhe ju nuk do të më shihni më;
¹¹ për gjykim, sepse është gjykuar tashmë sunduesi i kësaj bote.
¹² Shumë gjëra kam ende për t’ju thënë, por ju tani nuk mund t’i mbani.
¹³ Por kur të vijë Ai, Fryma e së vërtetës, do t’ju udhëzojë në çdo të vërtetë, sepse nuk do të flasë prej vetes së Vet, por do të flasë aq sa dëgjon dhe do t’ju lajmërojë ato që do të vijnë.
¹⁴ Ai do të më japë lavdi, sepse do të marrë prej Meje dhe do t’jua tregojë juve.
¹⁵ Gjithçka që ka Ati është Imja. Prandaj thashë, që e merr prej Meje dhe do t’jua tregojë juve.
¹⁶ Edhe pak kohë dhe nuk do të më shihni më dhe përsëri, pas pak, do të më shihni."
¹⁷ Pastaj disa prej dishepujve të Tij thanë me njëri-tjetrin: "Çfarë është kjo që na thotë: ‘Edhe pak dhe nuk do të më shihni dhe përsëri, pas pak, do të më shihni?’ dhe ‘Sepse po shkoj tek Ati’?"
¹⁸ Ata pra, thoshin: "Çfarë është kjo [që thotë]: ‘edhe pak’? Nuk e marrim vesh çfarë thotë."
¹⁹ Jezusi e dinte që ata donin ta pyesnin, dhe u tha: "Për këtë që thashë po vrisni mendjen me njeri-tjetrin: ‘Edhe pak kohë dhe nuk do të më shihni më’ dhe ‘përsëri, pas pak, do të më shihni.’?
²⁰ Me të vërtetë, me të vërtetë po ju them, që ju do të qani dhe do të mbani zi, por bota do të gëzojë; ju do të hidhëroheni, por hidhërimi juaj do të kthehet në gëzim.
²¹ Kur gruaja lind, ka dhimbje, sepse ora e saj ka ardhur. Por kur lind fëmijën, nuk e mban mend më ankthin nga gëzimi që lindi një njeri në botë.
²² Dhe ju pra, tani keni hidhërim. Por përsëri do t’ju shoh dhe zemra tuaj do të gëzohet dhe gëzimin tuaj askush nuk do t’jua heqë.
²³ Në atë ditë nuk do të më pyesni për asgjë. Me të vërtetë, me të vërtetë po ju them, çfarëdo që do t’i kërkoni Atit në emrin Tim, do t’jua japë.
²⁴ Deri tani nuk keni kërkuar asgjë në emrin Tim. Kërkoni dhe do të merrni, që gëzimi juaj të bëhet i plotë.
²⁵ Këto jua kam thënë në shëmbëlltyra. Po vjen ora që nuk do t’ju flas më në shëmbëlltyra, por do t’ju tregoj hapur për Atin.
²⁶ Në atë ditë do të kërkoni në emrin Tim dhe nuk po ju them që Unë do t’i lutem Atit për ju.
²⁷ Sepse vetë Ati ju do, ngaqë ju më keni dashur Mua dhe keni besuar që Unë erdha prej Perëndisë.
²⁸ Unë kam dalë nga Ati dhe kam ardhur në botë. Përsëri po e lë botën dhe po shkoj tek Ati."
²⁹ Dishepujt e Tij thanë: "Ja, tani po flet hapur dhe nuk po thua asnjë shëmbëlltyrë.
³⁰ Tani e shohim që Ti i di të gjitha dhe nuk ke nevojë që të të pyesë njeri. Prandaj e besojmë që Ti ke ardhur nga Perëndia.
³¹ Jezusi iu përgjigj: "Tani po besoni ju?
³² Ja, po vjen ora, dhe ka ardhur, që ju të shpërndaheni, secili në punët e veta dhe Mua të më lini vetëm. Nuk jam vetëm, sepse Ati është me Mua.
³³ Këto jua kam thënë, që të keni paqe në Mua. Në botë do të keni mundime, por mos e lëshoni veten; Unë e kam mposhtur botën."