1 "Unë jam hardhia e vërtetë dhe Ati Im është vreshtari.
² Çdo shermend në Mua që nuk jep fryt, Ai e heq dhe çdo degë që mban fryt e krasit, që të japë më shumë fryt.
³ Tani ju jeni të pastër për shkak të fjalës që ju kam folur.
⁴ Qëndroni në Mua dhe Unë në ju. Ashtu si shermendi nuk mund të japë fryt prej vetvetes, po të mos qëndrojë në hardhi, po ashtu as ju, po të mos qëndroni në Mua.
⁵ Unë jam hardhia, ju jeni shermendet. Ai që qëndron në Mua dhe Unë në të, ai mban shumë fryt; sepse pa Mua nuk mund të bëni asgjë.
⁶ Nëse dikush nuk qëndron në Mua, ai flaket jashtë si shermendi dhe fishket. I mbledhin dhe i hedhin në zjarr dhe ato digjen.
⁷ Po të qëndroni në Mua dhe fjalët e Mia të mbeten në ju, kërkoni çfarëdo që të doni dhe do t’ju bëhet.
⁸ Në këtë mori lavdi Ati Im, që ju të jepni shumë fryt dhe të bëheni dishepujt e Mi.
⁹ Siç më ka dashur Ati Mua, ju kam dashur edhe Unë ju. Qëndroni në dashurinë Time.
¹⁰ Po të mbani porositë e Mia, do të qëndroni në dashurinë Time, ashtu siç kam mbajtur Unë porositë e Atit Tim dhe qëndroj në dashurinë e Tij.
¹¹ Jua kam thënë këto që gëzimi Im të jetë ndër ju dhe që gëzimi juaj të jetë i plotë.
¹² Kjo është porosia Ime, që të doni njëri-tjetrin, ashtu si ju kam dashur Unë.
¹³ Askush nuk ka dashuri më të madhe se këtë, që të japë jetën për miqtë e vet.
¹⁴ Ju jeni miqtë e Mi, po të bëni ato që ju porosit Unë.
¹⁵ Nuk po ju them më shërbëtorë, sepse shërbëtori nuk e di çfarë bën i zoti i tij. Ndërsa ju, ju kam quajtur miq, sepse të gjitha ato që dëgjova për Atin Tim jua bëra të njohura juve.
¹⁶ Nuk më zgjodhët ju Mua, por Unë ju zgjodha ju dhe ju caktova, që të shkoni dhe të jepni fryt dhe që fryti juaj të mbetet, që çfarëdo që t’i kërkoni Atit në emrin Tim, t’jua japë.
¹⁷ Ky është urdhërimi Im për ju: të doni njëri-tjetrin.
¹⁸ Nëse bota ju urren, dijeni që përpara jush më ka urryer Mua.
¹⁹ Po të ishit nga bota, bota do ta donte çka është e vetja. Ju nuk jeni nga bota, por Unë ju kam zgjedhur nga bota dhe për këtë arsye bota ju urren.
²⁰ Mbani mend fjalën që ju thashë Unë: ‘Shërbëtori nuk është më i madh se zotëria i tij.’ Derisa më përndoqën Mua, do t’ju përndjekin edhe ju. Po të kenë mbajtur fjalën Time, do të mbajnë edhe tuajën.
²¹ Por të gjitha këto do t’jua bëjnë për shkak të emrit Tim, sepse nuk e njohin Atë që më ka dërguar Mua.
²² Po të mos kisha ardhur e t’u flisja atyre, ata nuk do të kishin mëkat. Por tani nuk kanë përligjje për mëkatin e tyre.
²³ Ai që më urren Mua, urren edhe Atin Tim.
²⁴ Po të mos kisha bërë midis tyre punët që askush tjetër nuk i ka bërë, ata nuk do të kishin mëkat; por tani ata jo vetëm që e kanë parë, por më kanë urryer edhe Mua edhe Atin Tim.
²⁵ Por kjo ka ndodhur që të përmbushej fjala e shkruar në ligjin e tyre: ‘Më urryen pa shkak’.
²⁶ Kur të vijë Ngushëlluesi që do t’ju dërgoj Unë prej Atit, Fryma e së vërtetës, që del prej Atit, Ai do të dëshmojë për Mua.
²⁷ Edhe ju do të dëshmoni, sepse keni qenë me Mua që në fillim."