14
¹ "Le të mos tronditet zemra juaj. Besoni në Perëndinë, besoni edhe në Mua.
² Në shtëpinë e Atit Tim ka shumë kthina. Po të mos ishte kështu, do t’jua kisha thënë. Sepse po shkoj të përgatis një vend për ju.
³ Dhe po të shkoj e të përgatis një vend për ju, përsëri do të vij e t’ju marr pranë vetes Sime, që ku jam Unë, të jeni edhe ju.
⁴ Ju e dini rrugën ku po shkoj [Unë]."
⁵ Thomai i tha: "Zot! Nuk e dimë ku po shkon. Si mund ta dimë ne rrugën?"
⁶ Jezusi i tha: "Unë jam rruga, e vërteta dhe jeta. Askush nuk vjen tek Ati, veçse përmes Meje.
⁷ Po të më kishit njohur Mua, do të njihnit edhe Atin Tim dhe që tani e tutje ju e njihni Atë dhe e keni parë."
⁸ Filipi i tha: "Zot, na e trego Atin dhe kjo na mjafton."
⁹ Jezusi i tha: "Ka kaq kohë që jam me ju dhe ti nuk më paske njohur, o Filip? Ai që më ka parë Mua ka parë Atin. Si thua ti vallë, na trego Atin?
¹⁰ Nuk e beson që Unë jam në Atin dhe Ati është në Mua? Fjalët që them Unë nuk i flas nga vetja Ime, por Ati që rri në Mua, bën veprat e Veta.
¹¹ Më besoni që Unë jam në Atin dhe Ati në Mua; përndryshe, besoni nga vetë veprat.
¹² Me të vërtetë, me të vërtetë po ju them, kush beson në Mua, edhe ai do të bëjë ato punë që bëj Unë. Madje më të mëdha se këto do të bëjë, sepse Unë shkoj tek Ati.
¹³ Çfarëdo që të kërkoni në emrin Tim, do ta bëj, që Ati të marrë lavdi në Birin.
¹⁴ Po të më kërkoni diçka në emrin Tim, Unë do ta bëj.
¹⁵ Po të më doni, do të mbani porositë e Mia.
¹⁶ Unë do t’i lutem Atit dhe Ai do t’ju japë një tjetër Ngushëllues, që të jetë përjetë me ju,
¹⁷ Frymën e së vërtetës, të cilën bota nuk mund ta marrë, sepse nuk e sheh, as e njeh. Por ju e njihni, sepse me ju qëndron dhe në ju do të jetë.
¹⁸ Nuk do t’ju lë jetimë; do të vij te ju.
¹⁹ Edhe pak dhe bota nuk më sheh më. Por ju do të më shihni; sepse Unë jetoj, edhe ju do të jetoni.
²⁰ Atë ditë ju do ta merrni vesh që Unë jam në Atin Tim, ju në Mua dhe Unë në ju.
²¹ Ai që ka porositë e Mia dhe i mban ato, ai më do Mua dhe ai që më do Mua do të ketë dashurinë e Atit Tim dhe Unë do ta dua dhe do t’i shfaq atij veten Time."
²² Juda, jo ai Iskarioti, i tha: "Zot! E si ka për të ndodhur që Ti do të na shfaqesh neve dhe jo botës?"
²³ Jezusi u përgjigj dhe i tha: "Po të më dojë njeri, ai do të mbajë fjalën Time. Ati Im do ta dojë dhe do të vijmë tek ai e do të bëjmë banesë me të.
²⁴ Ai që nuk më do, nuk i mban fjalët e Mia. Fjala që dëgjoni nuk është Imja, por e Atit që më ka dërguar Mua.
²⁵ Ju kam folur këto gjëra, duke qëndruar me ju.
²⁶ Por Ngushëlluesi, Fryma e Shenjtë, të cilin Ati do ta dërgojë në emrin Tim, do t’jua mësojë të gjitha dhe do t’jua kujtojë të gjitha ato që ju thashë [Unë].
²⁷ Paqe po ju lë, paqen Time po ju jap. Unë jua jap, jo siç e jep bota. Të mos ju tronditet zemra, as të mos trembet.
²⁸ Keni dëgjuar që ju kam thënë: ‘Po shkoj dhe do të vij te ju’. Po të më donit, do të gëzoheshit, sepse shkoj tek Ati, sepse Ati është më i madh se Unë.
²⁹ Jua thashë tani përpara se të ndodhë, që kur të ndodhë, të besoni.
³⁰ Nuk do të flas më shumë me ju, sepse po vjen i pari i botës. Nuk ka asnjë pushtet mbi Mua.
³¹ Por duhet ta dijë bota që Unë e dua Atin dhe bëj ashtu siç më ka porositur Ati. Ngrihuni. Le të largohemi prej këtej."