13
¹ Jezusi e dinte se do të kalonte nga kjo botë për tek Ati dhe tani përpara festës së Pashkëve, pasi i deshi të vetët që ishin në botë, duke e ditur që ora e Tij kishte ardhur, e shfaqi dashurinë për ta deri në fund.
² Ishte koha e darkës dhe djalli tashmë ia kishte shtënë në zemër Judë Iskariotit, birit të Simonit, mendimin që ta tradhtonte Atë.
³ Jezusi, duke e ditur se Ati ia kishte dhënë të gjitha në duart e Tij dhe që Ai kishte ardhur prej Perëndisë dhe tek Perëndia po shkonte,
⁴ u ngrit nga darka dhe largoi rrobat. Pastaj mori një peshqir dhe e ngjeshi rreth Vetes.
⁵ Pasi hodhi ujë në një enë, filloi të lante këmbët e dishepujve dhe t’i fshinte me peshqirin që e kishte ngjeshur rreth vetes.
⁶ Pastaj shkoi tek Simon Pjetri. Ky i tha: "Zot, Ti të më lash mua këmbët?"
⁷ Jezusi u përgjigj dhe i tha: "Atë që bëj Unë ti tani nuk e kupton, por do ta marrësh vesh më pas."
⁸ Pjetri i tha: "Kurrën e kurrës nuk do të m’i lash këmbët." Jezusi iu përgjigj: "Po nuk t’i lava, nuk ke pjesë me Mua."
⁹ Simon Pjetri i tha: "Zot, jo vetëm këmbët, por edhe duart dhe kokën."
¹⁰ Jezusi i tha: "Ai që është i larë nuk ka nevojë veçse të lajë këmbët, sepse është i tëri i pastër; ju jeni të pastër, por jo të gjithë."
¹¹ Sepse Ai e dinte atë që do ta tradhtonte. Prandaj tha: "Jo të gjithë jeni të pastër."
¹² Pra, pasi u lau këmbët, [dhe] mori rrobet e veta, u shtrua përsëri pranë tryezës dhe u tha: "A e dini çfarë ju kam bërë?
¹³ Ju më thërrisni Mjeshtër dhe Zot dhe mirë thoni, sepse ashtu jam.
¹⁴ Atëherë nëse Unë, Zot dhe Mjeshtër, lava këmbët tuaja, edhe ju duhet t’i lani këmbët njëri-tjetrit.
¹⁵ Sepse ju dhashë një shembull, që, siç bëra me ju, ashtu të bëni edhe ju.
¹⁶ Me të vërtetë, me të vërtetë po ju them, shërbëtori nuk është më i madh se i zoti i tij, as i dërguari më i madh se ai që e ka dërguar.
¹⁷ Nëse i dini këto, të jeni të lumtur po t’i bëni.
¹⁸ Nuk flas për të gjithë ju. Unë e di se kë kam zgjedhur, por që të përmbushet Shkrimi: ‘Ai që ha bukën Time, ka ngritur thembrën kundër Meje’.
¹⁹ Që tani po ju them para se të ndodhë, që, kur të ndodhë, të besoni që Unë jam Ai.
²⁰ Me të vërtetë, me të vërtetë po ju them, ai që pranon këdo që dërgoj Unë, më pranon Mua; dhe ai që më pranon Mua pranon Atë që më ka dërguar Mua."
²¹ Pasi Jezusi tha këto, u trondit thellë në shpirt dhe dëshmoi e tha: "Me të vërtetë, me të vërtetë po ju them, që njëri prej jush do të më tradhtojë."
²² Dishepujt shikonin njëri-tjetrin, duke mos ditur se për kë po fliste.
²³ Njëri prej dishepujve të Tij, të cilin Jezusi e donte, ishte ulur i mbështetur në kraharorin e Jezusit.
²⁴ Simon Pjetri ia bëri këtij me shenjë që ta pyeste për kë e kishte fjalën.
²⁵ Atëherë ai, që ishte mbështetur ashtu në kraharorin e Jezusit, i tha: "Zot, kush është?"
²⁶ Jezusi i përgjigjet: "Është ai të cilit do t’i jap kafshatën pasi ta kem ngjyer." Pra, si ngjeu kafshatën, [e mori] dhe ia dha Judë Iskariotit, birit të Simonit.
²⁷ Pastaj, pas kafshatës, tek ai hyri Satani. Atëherë Jezusi i thotë: "Ç’ke për të bërë, bëje shpejt."
²⁸ Askush prej atyre që ishin shtruar në tryezë nuk e mori vesh përse ia tha këtë.
²⁹ Sepse disa mendonin, meqë Juda kishte qesen, Jezusi i thoshte: "Bli ato që na duhen për festë", ose që t’u jepte diçka të varfërve.
³⁰ Atëherë si mori kafshatën, Juda doli menjëherë jashtë. Ishte natë.
³¹ Pasi doli ai, Jezusi tha: "Tani Biri i Njeriut mori lavdi dhe Perëndia mori lavdi në Të.
³² [Nëse Perëndia mori lavdi në Të], edhe Perëndia do t’i japë Atij lavdi në veten e Vet dhe do t’i japë lavdi menjëherë.
³³ Bijtë e Mi, edhe për pak kohë jam me ju. Do të më kërkoni dhe siç u kam thënë judenjve: ‘Ku shkoj Unë, ju nuk mund të vini’, tani po jua them edhe juve.
³⁴ Po ju jap një urdhërim të ri: ta doni njëri-tjetrin. Siç ju desha Unë, ashtu ta doni edhe ju njëri-tjetrin.
³⁵ Nga kjo do ta marrin vesh të gjithë që jeni dishepujt e Mi, po të keni dashuri për njëri-tjetrin."
³⁶ Simon Pjetri i tha: "Zot, ku po shkon?" Jezusi iu përgjigj [atij]: "Ku shkoj Unë, ti nuk mund të më vish pas tani. Por do të më ndjekësh më vonë."
³⁷ Pjetri i tha: "Zot! Përse nuk mund të të ndjek tani? Do të jap jetën time për Ty."
³⁸ Jezusi u përgjigj: "Ti do të japësh jetën tënde për Mua? Me të vërtetë, me të vërtetë po të them, këndesi nuk do të këndojë më parë se ti të më kesh mohuar tri herë."