kap 1
kap 2
kap 3
kap 4
kap 5
kap 6

Galatasve

^5
1 Për lirinë na çliroi Krishti. Qëndroni fort pra, dhe mos hyni përsëri nën zgjedhën e robërisë.
² Ja unë, Pali, ju them se po të bëni rrethprerjen, Krishti nuk do të ketë asnjë vlerë për ju.
³ I dëshmoj përsëri çdo njeriu që rrethpritet, se ai është i detyruar të zbatojë të tërë Ligjin.
⁴ Ju, që përpiqeni të shfajësoheni me anë të ligjit, jeni larguar nga Krishti; ju jeni shkëputur nga hiri.
⁵ Sepse ne, me anë të besimit, po presim me padurim nëpërmjet Frymës drejtësinë për të cilën shpresojmë.
⁶ Sepse në Krishtin Jezus nuk ka asnjë vlerë as rrethprerja as parrethprerja, por besimi që vepron nëpërmjet dashurisë.
⁷ Ju po vraponit mirë; kush ju pengoi që të mos i bindeni së vërtetës?
⁸ Kjo bindje nuk vjen prej Atij që ju thërret.
⁹ Pak maja e zë të gjithë brumin.
¹⁰ Kam bindje në Zotin për ju, se ju nuk do të mendoni ndryshe; por ai që ju prish mendjen, kushdo qoftë, do të vuajë dënimin e tij.
¹¹ Por mua, vëllezër, nëse ende predikoj rrethprerjen, përse vazhdojnë të më përndjekin? Atëherë shkandulli i kryqit paska rënë poshtë.
¹² Do të doja që ata që ju shqetësojnë, të gjymtoheshin vetë.
¹³ Sepse ju, vëllezër, u thirrët për të qenë të lirë; vetëm mos e përdorni lirinë për të kënaqur mishin, por shërbejini njëri-tjetrit nëpërmjet dashurisë.
¹⁴ Sepse i gjithë Ligji është përmbledhur në një thënie, në atë që "Do ta duash të afërmin tënd si veten tënde."
¹⁵ Por, nëse kafshoni dhe hani njëri-tjetrin, kini kujdes se mos gllabëroheni nga njëri-tjetri.
¹⁶ Dua të them, ecni sipas Frymës dhe nuk do të kënaqni aspak dëshirën e mishit.
¹⁷ Sepse mishi ka dëshira të kundërta me Frymën dhe Fryma të kundërta me mishin; sepse këta janë në kundërvënie me njëri-tjetrin, që ju të mos bëni ato që doni.
¹⁸ Por nëse udhëhiqeni prej Frymës, ju nuk jeni nën Ligj.
¹⁹ Veprat e mishit janë të dukshme; ato janë: imoraliteti, fëlliqësia, shthurja,
²⁰ idhujtaria, magjistaria, armiqësitë, grindja, xhelozia, zemërimet, zënkat, përçarjet, ndarjet,
²¹ smirat, të dehurit, zdërhalljet dhe të tjerat si këto, për të cilat po ju paralajmëroj, siç edhe ju kam paralajmëruar, se ata që bëjnë gjëra të tilla, nuk do të trashëgojnë mbretërinë e Perëndisë.
²² Por fryti i Frymës është dashuri, gëzim, paqe, durim, mirësi, zemërgjerësi, besim,
²³ butësi, vetëpërmbajtje; kundër këtyre gjërave nuk ka ligj.
²⁴ Ata që janë të Krishtit Jezus, kanë kryqëzuar mishin me epshet dhe dëshirat.
²⁵ Nëse jetojmë sipas Frymës, sipas Frymës duhet edhe të ecim.
²⁶ Të mos bëhemi mburracakë, duke ngacmuar njëri-tjetrin dhe duke pasur smirë për njëri-tjetrin.