kap 1
kap 2
kap 3
kap 4
kap 5
kap 6

Galatasve

^4
1 Dua të them se për sa kohë që trashëgimtari është fëmijë, nuk ka asnjë ndryshim nga skllavi, megjithëse është zot i gjithçkaje.
² Ai është nën mbikëqyrjen e kujdestarëve dhe të administratorëve deri në ditën që ka caktuar i ati.
³ Po kështu edhe ne, sa ishim të mitur, ishim skllevër të elementëve të botës.
⁴ Por kur u plotësua koha, Perëndia dërgoi Birin e Vet, të lindur nga një grua, të lindur nën Ligj,
⁵ që t’i çlirojë me anë të shpengimit ata që ishin nën Ligj, që të merrnim birësimin.
⁶ Meqë ju jeni bij, Perëndia ka dërguar Frymën e Birit të Vet në zemrat tona, Frymën që thërret: "Abba! O Atë!"
⁷ Kështu nuk je më skllav, por bir; dhe, përderisa je bir, je gjithashtu trashëgimtar nëpërmjet Perëndisë.
⁸ Dikur, kur nuk e njihnit Perëndinë, ju ishit skllevër të atyre që prej natyre nuk janë perëndi.
⁹ Por tani, që e njihni Perëndinë dhe për më tepër që u njohët nga Perëndia, si po ktheheni përsëri tek elementët e dobët dhe mjeranë, të cilëve doni t’u bëheni skllevër edhe një herë nga e para?
¹⁰ Ju kremtoni ditë, muaj, stinë dhe vite të veçanta.
¹¹ Kam frikë për ju, se mos jam munduar më kot me ju.
¹² Ju lutem, vëllezër, bëhuni si unë, sepse edhe unë si ju u bëra. Asgjë të keqe nuk më keni bërë.
¹³ Ju e dini se u bë shkak një sëmundje e trupit që ju predikova ungjillin herën e parë.
¹⁴ Edhe pse sëmundja e trupit tim ishte sprovë për ju, nuk më përbuzët dhe as më përçmuat. Përkundrazi, më pranuat sikur të isha engjëll i Perëndisë, sikur të isha Krishti Jezus.
¹⁵ Ç’u bë gjithë ai gëzim që kishit? Mund të dëshmoj për ju, se po të kishte qenë e mundur, do t’i kishit nxjerrë sytë tuaj dhe do të m’i kishit dhënë mua.
¹⁶ Qenkam bërë pra, armiku juaj duke ju thënë të vërtetën?
¹⁷ Ata tregohen të zellshëm për ju, jo për të mirë, por duan t’ju largojnë prej nesh, që të jeni të zellshëm për ta.
¹⁸ Por është mirë të jesh gjithmonë i zellshëm për të mirë dhe jo vetëm kur jam i pranishëm me ju.
¹⁹ Bijtë e mi, për të cilët po heq përsëri dhimbje lindjeje derisa Krishti të formohet në ju,
²⁰ sa do të doja të isha me ju tani dhe të ndryshoja tonin, sepse nuk di ç’të mendoj për ju.
²¹ Më thoni, ju që doni të jeni nën ligj, a nuk e dëgjoni ligjin?
²² Sepse është shkruar që Abrahami kishte dy djem, një prej skllaveje dhe një prej gruaje të lirë.
²³ Biri i tij nga skllavja kishte lindur sipas mishit, ndërsa ai nga gruaja e lirë kishte lindur nëpërmjet premtimit.
²⁴ Këto janë me kuptim të figurshëm, sepse gratë përfaqësojnë dy besëlidhje, njëra nga mali Sinai, që lind fëmijë që do të bëhen skllevër; kjo është Agari.
²⁵ Agari përfaqëson malin Sinai në Arabi dhe i përgjigjet Jeruzalemit të sotëm, që në të vërtetë është në robëri me bijtë e vet.
²⁶ Por Jeruzalemi, që është lart, është i lirë dhe është nëna jonë.
²⁷ Sepse është shkruar: "Gëzohu, o grua shterpë, ti që nuk lind. Shpërthe dhe bërtit, ti që nuk ndien dhimbje lindjeje; sepse më të shumtë janë fëmijët e gruas së braktisur sesa të asaj që ka burrë."
²⁸ Dhe ju vëllezër, ashtu si Isaku, jeni fëmijë të premtimit.
²⁹ Por ashtu si atëherë ai që kishte lindur sipas mishit e përndoqi atë që kishte lindur sipas Frymës, po ashtu ndodh edhe tani.
³⁰ Por çfarë thotë Shkrimi? "Flake gruan skllave dhe birin e saj, sepse biri i skllaves kurrë nuk do të jetë trashëgimtar me birin e gruas së lirë."
³¹ Kështu, vëllezër, nuk jemi fëmijë të gruas skllave, por të gruas së lirë.