kap 1
kap 2
kap 3
kap 4
kap 5
kap 6

Galatasve

^1
1 Pali, apostull i dërguar jo prej njerëzve, as me anë të njeriut, por nëpërmjet Jezus Krishtit dhe Perëndisë Atë, që e ngjalli prej të vdekurve,
² dhe të gjithë vëllezërit që janë me mua, kishave të Galacisë:
³ Paçi hir dhe paqe nga Perëndia Ati ynë dhe Zoti Jezus Krisht,
⁴ i cili dha Veten e Tij për mëkatet tona, që të na shpëtojë nga kjo kohë e ligë, sipas vullnetit të Perëndisë dhe të Atit tonë,
⁵ të cilit i qoftë lavdia në jetë të jetëve. Amen.
⁶ Çuditem se sa shpejt e braktisët Atë që ju thirri me anë të hirit të Krishtit, për të ndjekur një ungjill tjetër.
⁷ Jo se është ungjill tjetër, por ka disa që duan t’ju ngatërrojnë dhe përpiqen ta shtrembërojnë ungjillin e Krishtit.
⁸ Por edhe sikur ne, ose një engjëll nga qielli, t’ju predikojë një ungjill të ndryshëm nga ai që ju kemi predikuar ne, qoftë i mallkuar.
⁹ Siç e kemi thënë më parë, dhe po e them përsëri tani, nëse dikush ju predikon një ungjill të ndryshëm nga ai që keni marrë, qoftë i mallkuar.
¹⁰ Sepse kujt po përpiqem t’i bëj nder, njerëzve apo Perëndisë? Apo po kërkoj të kënaq njerëzit? Sepse po të përpiqesha ende të kënaqja njerëzit, nuk do të isha shërbëtor i Krishtit.
¹¹ Sepse dua t’ju vë në dijeni, vëllezër, se ungjilli që u predikua prej meje nuk është sipas njeriut.
¹² Sepse unë as nuk e kam marrë nga njeriu, as nuk ma ka mësuar njeri, por e kam marrë nëpërmjet një zbulese të Jezus Krishtit.
¹³ Sepse ju keni dëgjuar për sjelljen time të mëparshme, kur isha në judaizëm, se sa shumë e përndiqja kishën e Perëndisë dhe përpiqesha ta shkatërroja atë.
¹⁴ Përparoja në judaizëm duke ua kaluar shumë bashkëkohësve të kombit tim, duke qenë jashtë mase i zellshëm për traditat e etërve të mi.
¹⁵ Por kur Perëndisë, që më kishte veçuar që në bark të nënës dhe më kishte thirrur nëpërmjet hirit të Tij, i pëlqeu
¹⁶ ta zbulonte Birin e Vet tek unë, që ta predikoja ndër kombet, unë nuk shkova menjëherë për t’u këshilluar me njeri,
¹⁷ as u ngjita në Jeruzalem tek ata që ishin apostuj para meje, por shkova në Arabi dhe u ktheva përsëri në Damask.
¹⁸ Pastaj, pas tre vjetësh u ngjita në Jeruzalem për t’u njohur me Kefën dhe qëndrova me të pesëmbëdhjetë ditë.
¹⁹ Por nuk pashë ndonjë apostull tjetër, veç Jakobit, vëllait të Zotit.
²⁰ Ju siguroj përpara Perëndisë se nuk gënjej për këto që po ju shkruaj.
²¹ Pastaj shkova në Siri dhe në Cilici.
²² Isha fytyrë e panjohur për kishat e Judesë, që ishin në Krishtin.
²³ Ata vetëm dëgjonin të thuhej se "Ai që dikur na ka përndjekur, po predikon tani besimin që më parë përpiqej ta shkatërronte."
²⁴ Dhe i jepnin lavdi Perëndisë për shkakun tim.