kap 1
kap 2
kap 3
kap 4

Filipianeve

^4
1 Prandaj, vëllezërit e mi të dashur dhe fort të dëshiruar, gëzimi dhe kurora ime, kështu të qëndroni në Zotin, o miqtë e mi të dashur.
² I lutem Evodisë dhe i lutem Sintikës që të puqen në mendime në Zotin.
³ Po, edhe ty, o bashkëpunëtor besnik, po të lutem t’i ndihmosh këto gra, të cilat luftuan bashkë me mua për ungjillin, bashkë me Klementin dhe me bashkëpunëtorët e mi të tjerë, emrat e të cilëve janë në librin e jetës.
⁴ Gëzohuni në Zotin gjithmonë. Përsëri do ta them, gëzohuni!
⁵ Le ta njohin të gjithë njerëzit zemërbutësinë tuaj. Zoti është pranë.
⁶ Mos u shqetësoni për asgjë, por në çdo gjë ia bëni të ditur Perëndisë kërkesat tuaja në lutje dhe përgjërim duke shprehur falënderim.
⁷ Dhe paqja e Perëndisë, që tejkalon çdo zgjuarsi, do t’i ruajë zemrat dhe mendjet tuaja në Krishtin Jezus.
⁸ Së fundi, vëllezër, çdo gjë që është e vërtetë, çdo gjë që është fisnike, çdo gjë që është e drejtë, çdo gjë që është e pastër, çdo gjë që është e dashur, çdo gjë që ka emër të mirë, në ka ndonjë gjë të virtytshme ose që meriton të lavdërohet, këto t’i keni në mendje.
⁹ Vini në jetë ato që keni mësuar, që keni marrë, që keni dëgjuar dhe që keni parë në mua, dhe Perëndia i paqes do të jetë me ju.
¹⁰ U gëzova shumë në Zotin, që tani më në fund kujdesi juaj për mua u gjallërua përsëri; vërtet ju e kishit në mend, por nuk ju ishte dhënë rasti.
¹¹ Nuk po e them se kam nevojë, sepse unë jam mësuar të jem i kënaqur në çfarëdo gjendje që të jem.
¹² Di edhe të jem i përvuajtur, edhe të jetoj në mes të mirash; në çdo vend dhe në gjithçka kam mësuar edhe të nginjem edhe të kem uri, edhe të kem me tepri edhe të jem ngushtë.
¹³ Gjithçka jam në gjendje ta përballoj nëpërmjet Atij që më jep fuqi.
¹⁴ Megjithatë, mirë keni bërë që morët pjesë me mua në mundimin tim.
¹⁵ Dhe siç e dini vetë, o filipianë, në fillim të predikimit të ungjillit, kur u largova nga Maqedonia, asnjë kishë përveç jush nuk mori pjesë në veprimet e dhënies dhe të marrjes.
¹⁶ Sepse edhe në Selanik ju më dërguat ndihma kur kisha nevojë, jo vetëm një herë, por disa herë.
¹⁷ Jo se po kërkoj dhuratë, por kërkoj frytin që do të kthehet në dobinë tuaj.
¹⁸ Tani kam gjithçka që më duhet dhe me tepri; jam mbushur plot duke marrë nga Epafroditi dhuratat që më dërguat ju, një aromë erëmirë, një flijim i pranueshëm, që e kënaq Perëndinë.
¹⁹ Dhe Perëndia im do t’ua përmbushë të gjitha nevojat sipas pasurisë së Tij plot lavdi në Krishtin Jezus.
²⁰ Perëndisë dhe Atit tonë i qoftë lavdia për jetë të jetëve. Amen.
²¹ Përshëndetni të gjithë shenjtërit në Krishtin Jezus. Vëllezërit që janë me mua, ju përshëndesin.
²² Të gjithë shenjtërit ju përshëndesin, por sidomos ata nga shtëpia e Cezarit.
²³ Hiri i Zotit Jezus Krisht qoftë me shpirtin tuaj.