kap 1
kap 2
kap 3
kap 4

Filipianeve

^3
1 Së fundi, vëllezërit e mi, gëzohuni në Zotin. Mua nuk më rëndon t’ju shkruaj të njëjtat gjëra, dhe kjo ju bën më të sigurt.
² Ruhuni nga qentë, ruhuni nga ata që bëjnë keq, ruhuni nga ata që gjymtojnë mishin,
³ sepse ne jemi rrethprerja e vërtetë, ne që shërbejmë në Frymë Perëndie dhe lëvdohemi në Krishtin Jezus dhe që s’kemi besim në mishin,
⁴ megjithëse unë vetë kam arsye përse të besoj në mishin. Nëse ndonjë tjetër kujton se ka arsye përse të besojë në mishin, unë edhe më tepër:
⁵ i rrethprerë ditën e tetë, nga kombi i Izraelit, i fisit të Beniaminit, hebre prej hebrenjsh, sipas Ligjit, farize;
⁶ sa për zell, përndjekës i kishës, sa për drejtësi që është në Ligjin, pa të meta.
⁷ Por çfarëdo që për mua ishte fitim, tani e quaj si humbje për Krishtin.
⁸ E për më tepër, të gjitha gjërat i llogarita si humbje për atë që është shumë e madhe: njohjen e Krishtit Jezus, Zotit tim, për të cilin të gjitha i humba dhe i quaj hedhurina që të fitoj Krishtin
⁹ dhe të gjendem në Të, duke mos pretenduar ta kem drejtësinë time prej Ligjit, por atë që vjen nëpërmjet besimit në Krishtin, domethënë drejtësinë që buron nga Perëndia në bazë të besimit.
¹⁰ Dua ta njoh Krishtin, fuqinë e ngjalljes së Tij dhe pjesëmarrjen në vuajtjet e Tij, duke i ngjarë Atij në vdekje,
¹¹ me shpresën se mund të arrij në ngjalljen nga të vdekurit.
¹² Jo se tani e kam arritur këtë, apo kam arritur të jem i përkryer, por po rend se ndoshta e kap atë për të cilën edhe unë jam kapur nga Krishti Jezus.
¹³ Vëllezër, unë nuk e llogaris veten si një njeri që e ka arritur, por një gjë bëj: harroj ato që janë prapa dhe përpiqem të arrij ato që janë përpara,
¹⁴ rend me synimin për të marrë çmimin e thirrjes qiellore të Perëndisë në Krishtin Jezus.
¹⁵ Pra, të gjithë sa jemi të përsosur, këtë të kemi në mend. Nëse mendoni ndonjë gjë ndryshe, edhe për atë do t’ju ndriçojë Perëndia.
¹⁶ Megjithatë, prej aty ku kemi arritur, le të vazhdojmë të ecim në të njëjtën rrugë.
¹⁷ Më imitoni mua, o vëllezër, dhe vini re ata që ecin sipas shembullit që ju kemi dhënë ne.
¹⁸ Sepse, siç ju kam folur shpeshherë, por tani po jua them madje me lot ndër sy, shumë veta jetojnë si armiq të kryqit të Krishtit.
¹⁹ Por fundi i tyre është shkatërrimi, perëndia i tyre është barku dhe lavdërohen për gjëra që duhej të turpëroheshin, dhe e kanë mendjen te gjërat tokësore.
²⁰ Kurse atdheu ynë është në qiej, prej nga presim me padurim një Shpëtimtar, Zotin Jezus Krisht,
²¹ i cili do ta shndërrojë trupin tonë të përvuajtur që të ketë të njëjtën trajtë me trupin e Tij të lavdishëm, duke ushtruar fuqinë që Ai ka për t’ia nënshtruar gjithçka Vetes së Vet.