kap 1
kap 2
kap 3
kap 4

Filipianeve

^2
1 Nëse ka pra, ndonjë inkurajim në Krishtin, nëse ka ndonjë ngushëllim nga dashuria, nëse ka ndonjë shoqërim me Frymën, nëse ka ndonjë përdëllim dhe dhembshuri,
² bëjeni atëherë të plotë gëzimin tim, duke pasur të njëjtën mendje, duke pasur të njëjtën dashuri, të bashkuar në shpirt dhe në qëllim.
³ Asgjë mos bëni për ambicie vetjake as për mburrje të kotë, por secili ta shikojë me përvujtëri shokun, duke e çmuar më lartë se veten;
⁴ secili të mos shikojë vetëm punët e veta, por edhe punët e tjetrit.
⁵ Këtë qëndrim të mbani midis jush, që ishte edhe në Krishtin Jezus,
⁶ i cili, megjithëse kishte natyrën e Perëndisë, nuk e shikoi barazinë me Perëndinë si diçka për ta ruajtur me xhelozi,
⁷ por hoqi gjithçka prej Vetes, duke marrë formë shërbëtori dhe duke u bërë i ngjashëm me njerëzit.
⁸ Pasi doli me pamje si të njeriut, e përuli Vetveten duke u bërë i bindur deri në vdekje, madje me vdekje në kryq.
⁹ Prandaj edhe Perëndia e lartësoi Atë dhe i fali emrin që është mbi çdo emër,
¹⁰ që në emrin e Jezusit çdo gju të përulet, në qiell, mbi tokë e nën tokë,
¹¹ dhe çdo gjuhë të pohojë që Jezus Krishti është Zoti, për lavdi të Perëndisë Atë.
¹² Kështu pra, vëllezërit e mi, siç jeni bindur gjithmonë, jo vetëm në praninë time, por për më tepër tani në mungesën time, vazhdoni të punoni për shpëtimin tuaj me frikë dhe të dridhura,
¹³ sepse Perëndia është Ai që punon ndër ju, duke bërë që ju të doni dhe të veproni sipas vullnetit të Tij të mirë.
¹⁴ Të gjitha bëjini pa u ankuar dhe pa shumë debate,
¹⁵ që të jeni pa të meta dhe të pastër, bij të Perëndisë, të panjollosur midis një brezi të mbrapshtë dhe të shtrembër, midis të cilit ju ndriçoni si drita në botë,
¹⁶ duke e mbajtur lart fjalën e jetës, që të mund të mburrem në ditën e Krishtit, se nuk vrapova më kot, as u mundova më kot.
¹⁷ Por edhe sikur gjaku im të derdhet mbi flijim dhe në shërbesë të besimit tuaj, gëzohem dhe e ndaj gëzimin tim me të gjithë ju.
¹⁸ Po ashtu, edhe ju gëzohuni dhe ndajeni gëzimin tuaj bashkë me mua.
¹⁹ Shpresoj në Zotin Jezus që t’ju dërgoj së shpejti Timoteun, që edhe unë të marr zemër, kur të njihem me rrethanat tuaja.
²⁰ Sepse nuk kam askënd tjetër si atë, në një mendje me mua, që të shqetësohet sinqerisht për punët tuaja.
²¹ Sepse të gjithë përkujdesen për punët e veta, jo për punët e Jezus Krishtit.
²² Por ju e dini që Timoteu ka dhënë prova, që si biri ndaj të atit ka shërbyer bashkë me mua për ungjillin.
²³ Prandaj, shpresoj ta dërgoj menjëherë, sapo të shoh si do të më venë punët
²⁴ dhe jam i bindur në Zotin se edhe unë vetë do të vij së shpejti.
²⁵ Por e pashë të nevojshme t’ju dërgoj Epafroditin, vëllanë, bashkëpunëtorin dhe bashkëluftëtarin tim, të cilin ju gjithashtu e dërguat për të më shërbyer në nevojat e mia.
²⁶ Sepse ai ka mall për të gjithë ju dhe vuan, sepse ju keni dëgjuar për sëmundjen e tij.
²⁷ Dhe vërtet ka qenë i sëmurë në prag të vdekjes, por Perëndia e mëshiroi, dhe jo vetëm atë, por edhe mua, që të mos më shtohej hidhërim mbi hidhërim.
²⁸ Prandaj kam kaq dëshirë t’jua dërgoj atë, që kur ta shihni, të gëzoheni përsëri dhe unë të mos jem edhe aq në ankth.
²⁹ Prandaj priteni në Zotin me gëzim të plotë dhe njerëz të këtillë t’i nderoni,
³⁰ sepse për veprën e Krishtit ai iu afrua vdekjes, duke vënë në rrezik jetën, që të përmbushë atë që ju nuk mundët ta bënit në shërbimin tuaj për mua.