kap 1
kap 2
kap 3
kap 4

Filipianeve

^1
1 Pali dhe Timoteu, shërbëtorë të Krishtit Jezus, të gjithë shenjtërve në Krishtin Jezus që janë në Filipi, bashkë me mbikqyrësit dhe dhjakët:
² Hir dhe paqe paçi nga Perëndia Ati ynë dhe Zoti Jezus Krisht.
³ Falënderoj Perëndinë tim sa herë që ju kujtoj,
⁴ duke u lutur gjithmonë me gëzim në çdo lutje timen për të gjithë ju,
⁵ për pjesëmarrjen tuaj në ungjillin nga dita e parë deri tani.
⁶ Pikërisht për këtë jam i bindur se Ai që filloi një vepër të mirë te ju, do ta përfundojë deri në ditën e Krishtit Jezus.
⁷ E quaj të drejtë ta ndiej këtë për të gjithë ju, meqë ju kam në zemër, sepse qoftë kur jam në vargonj ashtu edhe kur mbroj apo vërtetoj ungjillin, të gjithë ju jeni pjesëmarrës në hir bashkë me mua.
⁸ Sepse Perëndia është dëshmitari im, se si përmallohem për të gjithë ju me dashurinë e zjarrtë të Krishtit Jezus.
⁹ Për këtë lutem, që dashuria juaj të mbushullojë gjithnjë e më shumë në njohje dhe gjykim të plotë,
¹⁰ që të miratoni më të mirën, në mënyrë që të jeni të pastër dhe të panjollë për ditën e Krishtit,
¹¹ të mbushur me frytin e drejtësisë që vjen nëpërmjet Jezus Krishtit, për lavdinë dhe lëvdimin e Perëndisë.
¹² Dua që ta dini, vëllezër, se ato që më kanë ndodhur mua kanë shërbyer për përparimin e mëtejshëm të ungjillit,
¹³ kështu që vargonjtë e mi për Krishtin janë bërë të njohur në mbarë garnizonin e pallatit si dhe te çdo njeri tjetër.
¹⁴ Shumica e vëllezërve, duke besuar në Zotin për shkak të vargonjve të mi, kanë marrë zemër më shumë për ta folur fjalën pa frikë.
¹⁵ Ka, vërtet, disa që e predikojnë Krishtin nga smira dhe për grindje, por disa të tjerë të nisur nga vullneti i mirë.
¹⁶ Këta e bëjnë vërtet nga dashuria, duke e ditur që jam vënë këtu për të mbrojtur ungjillin.
¹⁷ Kurse ata të tjerët e shpallin Krishtin për ambicie vetjake, jo me pastërti, duke menduar se mund të më shkaktojnë mundime ndërsa jam në vargonj.
¹⁸ Por, a ka rëndësi kjo? Pavarësisht në cilën mënyrë, qoftë duke u shtirur qoftë me të vërtetë, Krishti predikohet. Për këtë gëzohem dhe do të vazhdoj të gëzohem,
¹⁹ sepse e di që kjo do të më vlejë për shpëtimim tim nëpërmjet lutjes suaj dhe ndihmës së Frymës së Jezus Krishtit.
²⁰ Pres me padurim dhe me shpresë që në asgjë të mos turpërohem, por me guxim të madh, si gjithmonë edhe tani, të lartësohet Krishti në trupin tim, qoftë nëpërmjet jetës, qoftë nëpërmjet vdekjes.
²¹ Sepse për mua të jetosh është Krishti dhe të vdesësh është fitim.
²² Por nëse kam për të jetuar me trup, kjo më jep mundësi të bëj punë të frytshme; nuk e di ç’të zgjedh.
²³ Pra, jam i shtrënguar nga të dyja anët; dëshiroj të largohem nga jeta dhe të jem bashkë me Krishtin, çka do të ishte më mirë;
²⁴ megjithatë është më e nevojshme për ju që unë të qëndroj me trup.
²⁵ Duke qenë i bindur për këtë, e di se do të qëndroj dhe do të vazhdoj të jem me ju të gjithë, që ju të përparoni dhe të gëzoni në besim,
²⁶ që mburrja juaj për mua të rritet përherë e më shumë në Krishtin Jezus nëpërmjet ardhjes sime përsëri te ju.
²⁷ Çfarëdo që të ndodhë, silluni mirë në mënyrë të denjë për ungjillin e Krishtit; kështu që, si kur të vij e t’ju shoh apo kur të mos jem aty, të dëgjoj që ju po qëndroni të fortë në një frymë, duke luftuar bashkë si një i vetëm për besimin e ungjillit,
²⁸ pa u trembur në asgjë nga kundërshtarët. Kjo për ta është shenjë që paralajmëron shkatërrimin e tyre, ndërsa për ju tregon shpëtimin tuaj – dhe kjo nga Perëndia.
²⁹ Sepse juve ju është dhuruar për hir të Krishtit, që jo vetëm të besoni në Të, por edhe të vuani për Të,
³⁰ meqë po përjetoni të njëjtën betejë që e patë të bëhet tek unë, dhe tani e dëgjoni që po vazhdoj ta bëj.