kap 1
kap 2
kap 3
kap 4
kap 5
kap 6

Efesianeve

^6
1 Bij, bindjuni prindërve tuaj në Zotin, sepse kjo është e drejtë.
² Ndero atin dhe nënën tënde, që është urdhërimi i parë i shoqëruar me premtim,
³ që të të shkojë mbarë dhe të kesh jetë të gjatë mbi tokë.
⁴ Etër, mos i acaroni fëmijët tuaj, por rritini me disiplinën dhe këshillimin e Zotit.
⁵ Shërbëtorë, bindjuni zotërinjve tuaj që janë të kësaj bote, me frikë dhe të dridhura, me sinqeritetin e zemrës suaj, ashtu siç do t’i bindeshit Krishtit;
⁶ jo sa për sy e faqe, sa për të kënaqur njerëzit, por si shërbëtorë të Krishtit, duke bërë vullnetin e Perëndisë me gjithë shpirt.
⁷ Shërbeni me gjithë zemër, siç do t’i shërbenit Zotit dhe jo njerëzve,
⁸ duke ditur se secili, çfarëdo gjë të mirë që të bëjë, këtë do të marrë prej Zotit, qoftë shërbëtor, qoftë i lirë.
⁹ Dhe ju zotërinj, të njëjtën gjë bëni ndaj tyre. Hiqni dorë nga kërcënimi, dhe ta merrni vesh se Ai, që është Zoti si i tyre ashtu edhe juaji, është në qiej dhe Ai nuk i mban anën askujt.
¹⁰ Së fundi, bëhuni të fortë në Zotin dhe në fuqinë e pushtetit të Tij.
¹¹ Vishni mburojën e plotë të Perëndisë, që të jeni në gjendje t’u bëni ballë kurtheve të djallit.
¹² Sepse lufta jonë nuk bëhet kundër krijesave prej gjaku dhe mishi, por kundër krerëve, kundër autoriteteve, kundër sunduesve të kësaj bote të errët, kundër forcave shpirtërore të ligësisë që banojnë në vendet qiellore.
¹³ Prandaj rrëmbeni mburojën e plotë të Perëndisë, që të jeni në gjendje të qëndroni në ditë të ligë dhe, si t’i keni kryer të gjitha, të jeni të patundur.
¹⁴ Qëndroni të fortë pra, me brezin e së vërtetës ngjeshur pas mesit, të veshur me parzmoren e drejtësisë,
¹⁵ dhe në këmbë mbathni gatishmërinë e ungjillit të paqes,
¹⁶ dhe përmbi të gjitha, rrëmbeni mburojën e besimit, me të cilën do të jeni në gjendje të shuani të gjitha shigjetat e zjarrta të të ligut.
¹⁷ Merrni përkrenaren e shpëtimit dhe shpatën e Frymës, që është fjala e Perëndisë.
¹⁸ Lutuni në Frymë, duke përdorur çdo lutje dhe përgjërim në çdo kohë dhe, me këtë në mendje, qëndroni syhapur duke u përgjëruar me ngulmim për të gjithë shenjtërit.
¹⁹ Lutuni për mua, që kur të hap gojën, të më vijnë fjalë të atilla që të bëj të njohur me guxim misterin e ungjillit,
²⁰ për të cilin jam i dërguari në vargonj. Lutuni që të flas hapur për të, ashtu siç duhet folur.
²¹ Tikiku, vëllai i dashur dhe shërbyes besnik në Zotin, do t’ju vërë në dijeni për të gjitha, që edhe ju t’i dini rrethanat e mia dhe çfarë bëj unë.
²² E kam dërguar Tikikun te ju pikërisht për këtë qëllim, që të dini si jemi dhe që t’ju japë zemër.
²³ Paqe vëllezërve dhe dashuri me besim nga Perëndia Atë dhe Zoti Jezus Krisht.
²⁴ Hir paçin të gjithë ata që e duan Zotin tonë Jezus Krisht me dashuri të pashtershme.