kap 1
kap 2
kap 3
kap 4
kap 5
kap 6

Efesianeve

^5
1 Bëhuni pra, imitues të Perëndisë, si bij të dashur
² dhe ecni në dashuri, ashtu siç ju deshi edhe Krishti dhe dha Veten e Tij për ne, një ofrim dhe flijim erëmirë Perëndisë.
³ Imoraliteti, çdo lloj fëlliqësie apo lakmie as të mos zihen në gojë midis jush, siç u ka hije shenjtërve.
⁴ Nuk duhet të ketë as paturpësi, as biseda të ndyra, ose përqeshje, të cilat nuk ju kanë hije, por më tepër falënderim.
⁵ Sepse ta dini mirë, se asnjë njeri i përdalë apo i ndyrë apo lakmitar – një njeri i tillë është idhujtar – nuk gëzon trashëgimi në mbretërinë e Krishtit dhe të Perëndisë.
⁶ Askush të mos ju mashtrojë me fjalë boshe, sepse për shkak të këtyre gjërave bie zemërimi i Perëndisë mbi bijtë e mosbindjes.
⁷ Prandaj mos bashkoni me ta.
⁸ Sepse dikur ishit errësirë, por tani jeni dritë në Zotin. Ecni si fëmijë të dritës
⁹ (sepse fryti i dritës është në çdo mirësi, drejtësi dhe të vërtetë)
¹⁰ dhe përpiquni të gjeni ç’është e kënaqshme për Zotin.
¹¹ Mos merrni pjesë në veprat e pafrytshme të errësirës, përkundrazi t’i qortoni haptas.
¹² Sepse është turp madje edhe të thuhen gjërat që bëjnë ata në fshehtësi.
¹³ Por gjithçka, kur del në shesh prej dritës, bëhet e dukshme,
¹⁴ sepse drita është ajo që bën çdo gjë të dukshme. Prandaj thotë: "Zgjohu, ti që fle, ngjallu prej të vdekurve dhe mbi ty do të shndritë Krishti."
¹⁵ Prandaj hapini mirë sytë se si ecni, jo si të marrë por, si të mençur,
¹⁶ duke shfrytëzuar sa më mirë kohën, sepse ditët janë të liga.
¹⁷ Prandaj mos u bëni mendjelehtë, por kuptoni ç’është vullneti i Zotit.
¹⁸ Mos u dehni me verë, e cila çon në shthurje, por mbushuni me Frymën,
¹⁹ duke u shprehur me njëri-tjetrin në psalme, himne dhe këngë shpirtërore, duke kënduar dhe duke i thurur lavde Zotit në zemrën tuaj,
²⁰ duke falënderuar gjithmonë Perëndinë dhe Atin për të gjitha gjërat në emër të Zotit tonë Jezus Krisht,
²¹ duke iu nënshtruar njëri-tjetrit në frikën e Krishtit.
²² Ju gra, nënshtrojuni burrave tuaj, si Zotit.
²³ Sepse burri është koka e gruas, ashtu siç është Krishti koka e kishës, që është trupi i Tij, Shpëtimtari i të cilit është Ai Vetë.
²⁴ Ashtu si kisha i nënshtrohet Krishtit, po ashtu edhe gratë t’u nënshtrohen burrave në gjithçka.
²⁵ Burra, duajini gratë, ashtu siç e deshi Krishti kishën dhe dha jetën e Vet për të,
²⁶ që ta shenjtëronte. Ai e pastroi atë duke e larë me ujë nëpërmjet fjalës,
²⁷ që t’i paraqiste Vetes një kishë të lavdishme, pa pasur asnjë njollë apo rrudhë, apo diçka të këtillë, por të shenjtë dhe të papërlyer.
²⁸ Kështu edhe burrat duhet t’i duan gratë e veta si trupin e tyre. Ai që do gruan e vet, do veten e vet.
²⁹ Sepse askush nuk e ka urryer ndonjëherë mishin e vet, por e ushqen dhe përkujdeset për të, siç bën edhe Krishti për kishën,
³⁰ sepse ne jemi gjymtyrë të trupit të Tij.
³¹ Për këtë arsye njeriu do të lërë atin dhe nënën dhe do të bashkohet me gruan e vet dhe të dy do të bëhen një mish.
³² Ky mister është i madh; por unë po flas për Krishtin dhe me kishën.
³³ Megjithatë secili prej jush ta dojë gruan e vet siç do veten e vet, por dhe gruaja ta nderojë burrin.