kap 1
kap 2
kap 3
kap 4
kap 5
kap 6

Efesianeve

^3
1 Për këtë arsye them unë, Pali, i burgosuri i Krishtit Jezus për ju kombet,
² nëse vërtet keni dëgjuar për mbarështimin e hirit të Perëndisë që m’u dha për ju,
³ domethënë misterin, që m’u bë i njohur me anë të një zbulese, siç kam shkruar shkurtimisht më parë.
⁴ Duke e lexuar këtë, ju mund të kuptoni sa e njoh unë misterin e Krishtit,
⁵ i cili te brezat e tjerë nuk iu bë i njohur bijve të njerëzve, siç iu zbulua tani nëpërmjet Frymës apostujve dhe profetëve të Tij të shenjtë;
⁶ që kombet të jenë bashkëtrashëgimtare, gjymtyrë të një trupi dhe bashkëpjestare të premtimit në Krishtin Jezus nëpërmjet ungjillit,
⁷ shërbyes i të cilit u bëra nëpërmjet dhuratës së hirit të Perëndisë që m’u dha falë veprimit të fuqisë së Tij.
⁸ Mua, më të voglit nga të gjithë shenjtërit, m’u dha ky hir për t’u predikuar kombeve pasuritë e pasosura të Krishtit,
⁹ dhe për të nxjerrë në dritë [para të gjithëve] mbarështimin e atij misteri, që për epoka ka qenë fshehur në Perëndinë, që i ka krijuar të gjitha.
¹⁰ Synimi i Tij ishte që tani, nëpërmjet kishës, t’u bëhej e njohur mençuria e larmishme e Perëndisë sundimtarëve dhe autoriteteve në vendet qiellore,
¹¹ sipas qëllimit të përjetshëm, të cilin Ai e përmbushi në Krishtin Jezus Zotin tonë.
¹² Në Atë dhe nëpërmjet besimit në Të, kemi lirinë dhe mundësinë për t’iu afruar Perëndisë me bindje.
¹³ Prandaj po ju lutem që të mos ju lëshojë zemra për shkak të mundimeve të mia për ju, që janë lavdia juaj.
¹⁴ Për këtë arsye po bie në gjunjë përpara Atit,
¹⁵ prej të cilit merr emrin e gjithë familja në qiej dhe mbi tokë,
¹⁶ që Ai, me anë të pasurisë së lavdisë së Tij, t’ju bëjë të fortë e të fuqishëm nëpërmjet Frymës së Tij në qenien tuaj të brendshme,
¹⁷ që Krishti të banojë në zemrat tuaja nëpërmjet besimit. Dhe lutem, që të rrënjosur dhe me themele në dashuri,
¹⁸ të jeni në gjendje të kuptoni bashkë me të gjithë shenjtërit sa e gjerë, e gjatë, e lartë dhe e thellë është dashuria e Krishtit,
¹⁹ dhe ta njihni këtë dashuri që tejkalon çdo dije, që ju të mbusheni me të gjithë plotësinë e Perëndisë.
²⁰ Atij që është në gjendje të bëjë shumë më tepër se ato që kërkojmë ose mendojmë ne, sipas fuqisë që vepron brenda nesh,
²¹ Atij i qoftë lavdia në kishën dhe në Krishtin Jezus në të gjithë brezat për jetë të jetëve. Amen.