kap 1
kap 2
kap 3
kap 4
kap 5
kap 6

Efesianeve

^2
1 Ju ishit të vdekur në shkeljet dhe në mëkatet tuaja,
² në të cilat ecnit më parë sipas jetës së kësaj bote, duke ndjekur prijësin që sundon mbi ajrin, frymën që tani po vepron në bijtë e mosbindjes.
³ Dikur edhe ne të gjithë jetonim midis tyre duke ndjekur epshet e mishit tonë, duke kënaqur dëshirat e mishit dhe të mendjes dhe ishim prej natyre bij të zemërimit, ashtu si edhe të tjerët.
⁴ Por Perëndia, duke qenë i pasur në mëshirë, për shkak të dashurisë së Vet të madhe me të cilën na deshi,
⁵ edhe kur ne ishim të vdekur në shkeljet tona, na dha jetë bashkë me Krishtin – nëpërmjet hirit jeni shpëtuar -
⁶ dhe na ngriti bashkë me Krishtin dhe na uli me Të në vendet qiellore në Krishtin Jezus,
⁷ për të na treguar në kohët që do të vijnë pasuritë tepër të mëdha të hirit të Tij me anë të mirësisë ndaj nesh në Krishtin Jezus.
⁸ Sepse me anë të hirit jeni shpëtuar nëpërmjet besimit dhe kjo jo prej vetes suaj, por është dhuratë e Perëndisë,
⁹ jo prej veprave, që askush të mos mburret.
¹⁰ Sepse ne jemi vepër e Tij, të krijuar në Krishtin Jezus për vepra të mira, të cilat Perëndia i ka përgatitur që më parë, që ne t’i vëmë në jetë.
¹¹ Prandaj mos harroni se dikur ju, të lindur si kombe, që quheni "Parrethprerje" prej atyre që e quajnë veten "Rrethprerje" (ajo që kryhet në mish nga dora e njeriut),
¹² mos harroni se në atë kohë ju ishit pa Krishtin, të përjashtuar nga qytetaria e Izraelit dhe të huaj për besëlidhjet e premtimit, pa shpresë dhe pa Perëndi në këtë botë.
¹³ Por tani në Krishtin Jezus ju, që dikur ishit larg, jeni afruar me anë të gjakut të Krishtit.
¹⁴ Sepse Ai Vetë është paqja jonë, që i ka bërë një të dy popujt dhe ka rrëzuar murin e mesëm ndarës, domethënë armiqësinë, duke shfuqizuar nëpërmjet mishit të Vet
¹⁵ Ligjin e përbërë nga urdhëresa dhe rregullore. Ai kishte si qëllim që nga dy të ndërtonte një njeri të ri në Veten e Tij, duke vendosur paqe,
¹⁶ dhe t’i pajtonte në një trup të dy me Perëndinë me anë të kryqit, nëpërmjet të cilit Ai vrau armiqësinë.
¹⁷ Ai erdhi dhe ju predikoi paqen juve që ishit larg dhe atyre që ishin afër,
¹⁸ sepse nëpërmjet Tij ne të dy mund të hyjmë tek Ati me anë të një Fryme.
¹⁹ Kështu pra, ju nuk jeni më të huaj, as të ardhur, por jeni bashkëqytetarë me shenjtërit dhe pjesëtarë të familjes së Perëndisë,
²⁰ të ndërtuar mbi themelin e apostujve dhe të profetëve, ku Vetë Krishti Jezus është guri i këndit,
²¹ në të cilin e gjithë ndërtesa, e lidhur bashkë, ngrihet për t’u bërë një tempull i shenjtë në Zotin;
²² në të cilin edhe ju po ndërtoheni së bashku për t’u bërë banesë e Perëndisë në Frymë.