kap 1
kap 2
kap 3
kap 4
kap 5
kap 6

Efesianeve

^1
1 Pali, apostull i Krishtit Jezus sipas vullnetit të Perëndisë, shenjtërve që janë në Efes, besnikë në Krishtin Jezus:
² Hir dhe paqe paçi prej Perëndisë Atit tonë dhe Zotit Jezus Krisht.
³ I bekuar qoftë Perëndia dhe Ati i Zotit tonë Jezus Krisht, i cili na ka bekuar në vendet qiellore me çdo bekim shpirtëror në Krishtin,
⁴ siç na zgjodhi në Atë përpara themelimit të botës, që të jemi të shenjtë dhe të panjollosur përpara Tij. Me dashuri
⁵ na paracaktoi për të na birësuar për Veten e Tij, nëpërmjet Jezus Krishtit, me pëlqimin dhe vullnetin e Tij
⁶ për lavdërimin e hirit të Tij të lavdishëm, të cilin na e dha falas me anë të Birit të Tij të dashur.
⁷ Në Atë kemi shpengim nëpërmjet gjakut të Tij, faljen e shkeljeve tona, sipas pasurisë së hirit të Tij,
⁸ të cilin Ai e derdhi me begati mbi ne me të gjithë mençurinë dhe zgjuarësinë.
⁹ Na bëri të njohur misterin e vullnetit të Tij, sipas mirësisë së Tij që e kishte caktuar në Krishtin,
¹⁰ për të realizuar kur të përmbushet koha planin që është: të përmbledhë në Krishtin të gjitha gjërat në qiej dhe në tokë.
¹¹ Në Atë ne u zgjodhëm gjithashtu si trashëgimtarë, duke u paracaktuar sipas planit të Tij që i kryen të gjitha në përputhje me qëllimin e vullnetit të Tij,
¹² që ne, që shpresuam që në fillim në Krishtin, të ishim për lëvdimin e lavdisë së Tij.
¹³ Edhe ju, pasi dëgjuat fjalën e së vërtetës, ungjillin e shpëtimit, dhe pasi besuat në Atë, morët vulën e Tij, Frymën e Shenjtë të premtuar,
¹⁴ që është kapari i trashëgimit tonë, deri në shpengimin e atyre që i përkasin Perëndisë, për lëvdimin e lavdisë së Tij.
¹⁵ Prandaj edhe unë, duke dëgjuar për besimin mes jush në Zotin Jezus dhe dashurinë për të gjithë shenjtërit,
¹⁶ nuk pushoj së falënderuari për ju, duke ju kujtuar në lutjet e mia;
¹⁷ që Perëndia i Zotit tonë Jezus Krisht, Ati i lavdisë, t’ju japë frymë mençurie dhe zbulimi që ta njihni Atë më mirë,
¹⁸ dhe t’ju ndriçojë sytë e zemrës, që ta merrni vesh se cila është shpresa me të cilën ju ka thirrur, cila është pasuria e lavdisë së trashëgimisë së Tij ndër shenjtërit,
¹⁹ cila është madhështia tepër e madhe e fuqisë së Tij për ne që besojmë, sipas veprimit të fuqisë së Tij të pushtetshme,
²⁰ të cilën Ai e vuri në veprim te Krishti, kur e ngjalli Atë prej të vdekurve dhe e uli në të djathtën e Vet në vendet qiellore,
²¹ mbi çdo sundim e pushtet, fuqi e zotërim dhe mbi çdo emër që është vënë jo vetëm në këtë jetë, por edhe në atë që po vjen.
²² Vuri gjithçka nën këmbët e Tij, dhe e caktoi Atë si kreun mbi çdo gjë për kishën,
²³ e cila është trupi i Tij, plotësia e Atij që i përmbush të gjitha në gjithçka.