kap 1

Juda

¹ Juda, shërbëtor i Jezus Krishtit dhe vëlla i Jakobit, atyre që janë thirrur, që gëzojnë dashurinë e Perëndisë Atë dhe që ruhen në Jezus Krishtin:
² Qoftë me begati mes jush mëshira, paqja dhe dashuria.
³ Të dashurit e mi, megjithëse kisha dëshirë të madhe t’ju shkruaja për shpëtimin tonë të përbashkët, e ndjeva të nevojshme t’ju shkruaj për t’ju nxitur që të luftoni për besimin që u është përcjellë një herë e përgjithmonë shenjtërve.
⁴ Sepse disa njerëz, dënimi i të cilëve është shkruar prej kohësh, janë futur fshehurazi. Këta janë njerëz të papërshpirtshëm, që e kthejnë në shthurje hirin e Perëndisë sonë dhe mohojnë Jezus Krishtin, Sovranin dhe Zotin tonë të vetëm.
⁵ Dua t’jua kujtoj, megjithëse i dini tashmë të gjitha, se Zoti, e shpëtoi popullin një herë e përgjithmonë nga toka e Egjiptit, por pastaj i shkatërroi ata që nuk besonin.
⁶ Engjëjt që nuk e ruajtën pozitën e tyre qiellore, por braktisën banesën e tyre, Ai i ka mbajtur në pranga të përjetshme nën errësirë për gjykimin në ditën e madhe.
⁷ Po ashtu, Sodoma e Gomorra bashkë me qytetet përreth tyre u dhanë pas imoralitetit dhe shkuan pas veseve të mbrapshta. Këta jepen si shembull të atyre që pësojnë ndëshkimin e zjarrit të përjetshëm.
⁸ Po kështu edhe këta, duke ëndërruar, ndotin trupin, përbuzin pushtetin, shajnë fuqitë qiellore.
⁹ Por Mikaeli, kryeengjëlli, kur hahej me djallin duke bërë debat për trupin e Moisiut, nuk guxoi të sillte ndonjë akuzë sharëse, por tha: "Të qortoftë Zoti."
¹⁰ Por këta njerëz shajnë ato që nuk i dinë; dhe gjërat që i kuptojnë me instinkt, si kafshë pylli, bëhen shkak për shkatërrimin e tyre.
¹¹ Mjerë ata! Sepse kanë marrë udhën e Kainit; u turrën për përfitim duke rënë në gabimin e Balaamit dhe u zhdukën në rebelimin e Koreut.
¹² Këta njerëz janë njolla në gostitë tuaja të dashurisë kur shtrohen bashkë me ju pa druajtje, barinj që kullosin vetëm veten e tyre, re pa shi që i davaritin erërat, pemë vjeshte pa fryte e me rrënjë të shkulura, që kanë vdekur dy herë.
¹³ Ata janë valë të egra deti që nxjerrin si shkumë turpin e tyre, yje të këputur për të cilët është ruajtur përjetë terri i errësirës.
¹⁴ Madje për këta ka profetizuar Enoku, nga brezi i shtatë i Adamit, duke thënë: "Ja, Zoti erdhi me mijëra shenjtër të Vet,
¹⁵ për t’u bërë gjyqin të gjithëve dhe për të ndëshkuar çdo shpirt për të gjitha veprat e papërshpirtshme që kanë bërë me paudhësi dhe për të gjitha fjalët e ashpra që kanë folur kundër Tij mëkatarët e papërshpirtshëm."
¹⁶ Këta janë murmuritës, ankues, njerëz që shkojnë pas epsheve; nga goja nxjerrin fjalë të fryra, duke u bërë lajka njerëzve për dobinë vetiake.
¹⁷ Por ju, të dashurit e mi, kujtoni fjalët që kanë thënë më parë apostujt e Zotit tonë Jezus Krisht,
¹⁸ kur ju thoshin: "Në kohët e fundit do të ketë përqeshës, që do të shkojnë pas dëshirave të tyre të papërshpirtshme."
¹⁹ Këta janë njerëz që çojnë në përçarje, njerëz epshorë, pa Frymë.
²⁰ Por ju, o të dashur, ngrijeni veten në besimin tuaj më të shenjtë, lutuni me Frymën e Shenjtë,
²¹ qëndroni në dashurinë e Perëndisë, ndërsa prisni me padurim mëshirën e Zotit tonë Jezus Krishtit për jetën e amshuar.
²² Kini mëshirë për ata që dyshojnë;
²³ shpëtojini të tjerët, duke ia rrëmbyer zjarrit; për disa kini mëshirë me druajtje, duke urryer madje edhe rrobën e ndotur prej mishit.
²⁴ Atij që mund t’ju ruajë se mos rrëzoheni dhe mund t’ju nxjerrë para lavdisë së Tij pa të meta dhe me gëzim të madh,
²⁵ të vetmit Perëndi, Shpëtimtarit tonë nëpërmjet Jezus Krishtit, Zotit tonë, i qofshin lavdia, madhështia, fuqia dhe pushteti para gjithë kohërave, tani dhe përgjithmonë. Amen.