kap 1
kap 2
kap 3
kap 4
kap 5

1 Gjoni

^5
1 Kushdo që beson se Jezusi është Krishti, ka lindur prej Perëndisë, dhe kushdo që do Atin, do edhe fëmijën që ka lindur prej Tij.
² Ja se si e dimë që i duam bijtë e Perëndisë: duke dashur Perëndinë dhe duke zbatuar urdhërimet e Tij.
³ Sepse kjo është dashuria për Perëndinë: t’u bindemi urdhërimeve të Tij. Dhe urdhërimet e Tij nuk janë të rënda,
⁴ sepse kushdo që ka lindur prej Perëndisë, e mposht botën. Kjo është fitorja që ka ngadhënjyer mbi botën: besimi ynë.
⁵ Kush është ai që mposht botën? Vetëm ai që beson se Jezusi është Biri i Perëndisë.
⁶ Ky është ai që ka ardhur nëpërmjet ujit dhe gjakut, Jezus Krishti. Nuk erdhi vetëm me ujë, por me ujë dhe me gjak. Fryma është ai që dëshmon, sepse Fryma është e vërteta.
⁷ Sepse tre janë ata që dëshmojnë:
⁸ Fryma, uji dhe gjaku dhe të tre janë për të njëjtën gjë.
⁹ Ne pranojmë dëshminë e njerëzve, por dëshmia e Perëndisë është më e madhe, sepse dëshmia e Perëndisë është ajo që Ai ka bërë për Birin e Vet.
¹⁰ Ai që beson në Birin e Perëndisë, e ka këtë dëshmi në zemrën e vet. Ai që nuk i beson Perëndisë, e ka bërë Atë gënjeshtar, sepse nuk ka besuar në dëshminë që ka dhënë Perëndia për Birin e Vet.
¹¹ Dëshmia është kjo: Perëndia na ka dhënë jetën e amshuar dhe kjo jetë është në Birin e Tij.
¹² Ai që ka Birin, ka jetën; ai që nuk e ka Birin e Perëndisë, nuk e ka jetën.
¹³ Këto ju kam shkruar juve që besoni në emrin e Birit të Perëndisë, që ta dini se keni jetën e amshuar.
¹⁴ Kjo është bindja që kemi për Të: po të kërkojmë diçka sipas vullnetit të Tij, Ai na dëgjon.
¹⁵ Po ta dimë se Ai na dëgjon për gjithçka që kërkojmë, atëherë e dimë se i kemi ato që i kemi kërkuar Atij.
¹⁶ Po ta shohë dikush vëllanë e vet duke bërë një mëkat që nuk çon në vdekje, duhet të lutet dhe Perëndia do t’i japë jetë. E kam fjalën për ata që bëjnë mëkat që nuk çon në vdekje. Ka një mëkat që çon në vdekje; nuk po them që ai të lutet për këtë.
¹⁷ Çdo paudhësi është mëkat, por ka një mëkat që nuk çon në vdekje.
¹⁸ E dimë që kushdo që ka lindur nga Perëndia, nuk jeton në mëkat, por Ai që lindi nga Perëndia, e ruan atë dhe i ligu nuk e prek.
¹⁹ E dimë se jemi prej Perëndisë dhe se e tërë bota ndodhet nën pushtetin e të ligut.
²⁰ Dimë edhe se Biri i Perëndisë ka ardhur dhe na ka dhënë aftësinë për të kuptuar, që ta njohim Atë që është i vërtetë. Dhe ne jemi në Atë që është i vërtetë, në Birin e Tij Jezus Krishtin. Ky është Perëndia i vërtetë dhe jeta e amshuar.
²¹ Bijtë e mi, ruajeni veten prej idhujve.