kap 1
kap 2
kap 3
kap 4
kap 5

1 Gjoni

^4
1 Të dashurit e mi, mos i besoni çdo fryme, por i provoni më parë frymët nëse ato janë prej Perëndisë, sepse shumë profetë të rremë kanë dalë në botë.
² Me këtë e njihni Frymën e Perëndisë: çdo frymë që pohon se Jezus Krishti ka ardhur në mish është prej Perëndisë,
³ dhe çdo frymë që nuk e pohon Jezusin, nuk është prej Perëndisë. Kjo është fryma e antikrishtit, të cilin e keni dëgjuar se po vjen dhe tashmë është në botë.
⁴ Ju jeni prej Perëndisë, bijtë e mi, dhe i keni mposhtur ata, sepse Ai që është në ju, është më i madh se ai që është në botë.
⁵ Ata janë të botës, prandaj flasin nga pozitat e botës dhe bota i dëgjon.
⁶ Ne jemi prej Perëndisë; kushdo që njeh Perëndinë, na dëgjon ne; kushdo që nuk është prej Perëndisë, nuk na dëgjon. Me këtë e dallojmë frymën e së vërtetës nga fryma e gabimit.
⁷ Të dashurit e mi, ta duam njëri-tjetrin, sepse dashuria është prej Perëndisë dhe kushdo që ka dashuri, ka lindur prej Perëndisë dhe e njeh Perëndinë.
⁸ Ai që nuk ka dashuri, nuk e njeh Perëndinë, sepse Perëndia është dashuri.
⁹ Ja se si e shfaqi Perëndia dashurinë për ne: Perëndia dërgoi në botë Birin e Vet të vetëm që ne të jetojmë nëpërmjet Tij.
¹⁰ Këtu qëndron dashuria: jo se ne e kemi dashur Perëndinë, por Ai na deshi ne dhe dërgoi Birin e Vet si flijim pajtues për të shlyer mëkatet tona.
¹¹ Të dashurit e mi, meqë Perëndia na deshi në këtë mënyrë, edhe ne duhet ta duam njëri-tjetrin.
¹² Askush nuk e ka parë ndonjëherë Perëndinë. Po të duam njëri-tjetrin, Perëndia qëndron te ne dhe dashuria e Tij bëhet e përsosur në ne.
¹³ E dimë se ne qëndrojmë tek Ai dhe Ai tek ne, sepse Ai na ka dhuruar prej Frymës së Vet.
¹⁴ Ne vetë e kemi parë dhe dëshmojmë se Ati ka dërguar Birin si Shpëtimtar të botës.
¹⁵ Nëse dikush pohon se Jezusi është Biri i Perëndisë, Perëndia qëndron në të dhe ai në Perëndinë.
¹⁶ Ne e kemi njohur dhe e kemi besuar dashurinë që Perëndia ka për ne. Perëndia është dashuri dhe ai që rri në dashuri, rri në Perëndinë dhe Perëndia qëndron në të.
¹⁷ Me këtë, dashuria është përsosur mes nesh, që të kemi besim ditën e gjykimit, sepse siç është Ai, ashtu jemi edhe ne në këtë botë.
¹⁸ Nuk ka frikë në dashuri. Përkundrazi, dashuria e përsosur e flak tej frikën, sepse frika përmban ndëshkimin dhe ai që ka frikë, nuk është përsosur në dashuri.
¹⁹ Ne e duam, sepse Ai na deshi ne më parë.
²⁰ Po të thotë dikush: "E dua Perëndinë" dhe urren vëllanë e vet, është gënjeshtar, sepse ai që nuk do vëllanë e vet, të cilin e ka parë, nuk mund ta dojë Perëndinë, që nuk e ka parë.
²¹ Ai na ka dhënë këtë urdhërim: ai që do Perëndinë, do edhe vëllanë e vet.