kap 1
kap 2
kap 3
kap 4
kap 5

1 Gjoni

^3
1 Shikoni ç’dashuri na ka dhënë Ati, saqë të quhemi bij të Perëndisë dhe të këtillë jemi vërtet. Prandaj bota nuk na njeh, sepse nuk e ka njohur Atë.
² Të dashurit e mi, tani ne jemi bij të Perëndisë, por se çfarë do të jemi, kjo nuk është bërë ende e njohur. Veçse dimë që, kur të shfaqet Ai, do të jemi të ngjashëm me Të, sepse do ta shohim Atë ashtu siç është.
³ Kushdo që e ka këtë shpresë tek Ai, pastron veten, ashtu siç është i pastër Ai.
⁴ Kushdo që bën mëkat, shkel edhe ligjin; në fakt, mëkati është shkelje e ligjit.
⁵ Por ju e dini se Ai u shfaq që të heqë mëkatet. Në Të nuk ka mëkat.
⁶ Kushdo që qëndron në Të, nuk jeton në mëkat; kushdo që mëkaton, nuk e ka parë Atë, as nuk e ka njohur.
⁷ Bijtë e mi, askush të mos ju mashtrojë. Kushdo që bën atë që është e drejtë, është i drejtë, ashtu siç është i drejtë Ai;
⁸ Kushdo që bën atë që është mëkat, është prej djallit, sepse djalli ka mëkatuar që në fillim. Për këtë u shfaq Biri i Perëndisë, që të shkatërronte punët e djallit.
⁹ Kushdo që ka lindur prej Perëndisë, nuk jeton në mëkat, sepse fara e Tij qëndron në të; ai nuk mund të mëkatojë, sepse ka lindur prej Perëndisë.
¹⁰ Me këtë del e qartë se kush janë bijtë e Perëndisë dhe kush janë bijtë e djallit: kushdo që nuk bën atë që është e drejtë, nuk është prej Perëndisë, po kështu edhe ai që nuk e do vëllanë e vet.
¹¹ Sepse ky është mesazhi që keni dëgjuar që në fillim: të duam njëri-tjetrin,
¹² jo si Kaini që ishte prej të ligut dhe vrau vëllanë e vet. Dhe pse e vrau? Sepse veprat e tij ishin të liga, ndërsa ato të vëllait të tij ishin të drejta.
¹³ Mos u çuditni, o vëllëzër, nëse bota ju urren.
¹⁴ Ne e dimë se kemi kaluar nga vdekja në jetë, sepse ne i duam vëllezërit. Ai që nuk i do, mbetet te vdekja.
¹⁵ Kushdo që urren vëllanë e vet, është vrasës, dhe e dini se asnjë vrasës nuk gëzon jetë të amshuar në veten e vet.
¹⁶ Ja se si e njohim dashurinë: Ai ka dhënë jetën e Vet për ne dhe ne duhet të japim jetën për vëllezërit.
¹⁷ Por nëse dikush i ka të mirat e botës dhe sheh që vëllai i tij ka nevojë dhe nuk i vjen keq për të, si mund të qëndrojë dashuria e Perëndisë tek ai?
¹⁸ Bijtë e mi, të mos duam me fjalë, as me gjuhë, por me vepra dhe me vërtetësi.
¹⁹ Me këtë do ta marrim vesh se jemi prej së vërtetës dhe do ta qetësojmë zemrën tonë përpara Tij,
²⁰ sa herë të na qortojë zemra jonë. Sepse Perëndia është më i madh se zemra jonë dhe di gjithçka.
²¹ Të dashurit e mi, nëse zemra [jonë] nuk na qorton, atëherë jemi të bindur para Perëndisë
²² dhe marrim prej Tij çfarëdo që t’i kërkojmë, sepse ne i mbajmë urdhërimet e Tij dhe bëjmë ato që e kënaqin Atë.
²³ Urdhërimi i Tij është ky: të besojmë në emrin e Birit të Tij Jezus Krisht dhe të duam njëri-tjetrin, siç na ka porositur Ai.
²⁴ Cilido që i mban urdhërimet e Tij, mbetet tek Ai dhe Ai në të. Ja se si e dimë se Ai qëndron te ne: me anë të Frymës që Ai na ka dhënë.