kap 1
kap 2
kap 3
kap 4
kap 5

1 Gjoni

^2
1 Bijtë e mi, këto po jua shkruaj që të mos mëkatoni. Dhe po të bëjë dikush mëkat, e kemi një që ndërhyn tek Ati për të na mbrojtur, të drejtin Jezus Krisht.
² Ai Vetë është flijimi pajtues për shlyerjen e mëkateve tona dhe jo vetëm për mëkatet tona, por edhe për mëkatet e tërë botës.
³ Po të zbatojmë urdhërimet e Tij, atëherë e dimë se kemi arritur ta njohim Atë.
⁴ Ai që thotë: "E kam njohur" dhe nuk i zbaton urdhërimet e Tij, është gënjeshtar dhe e vërteta nuk është në të,
⁵ por kushdo që i bindet fjalës së Tij, dashuria e Perëndisë vërtet është përsosur në të. Ja se si e marrim vesh që jemi në Të:
⁶ kush thotë se vazhdon të jetojë në Të, duhet që edhe ai të ecë ashtu siç ka ecur Ai.
⁷ Të dashurit e mi, nuk po ju shkruaj një urdhërim të ri, por një urdhërim të vjetër, të cilin ju e keni pasur që prej fillimit dhe ky urdhërim i vjetër është fjala që ju keni dëgjuar.
⁸ Megjithatë, një urdhërim të ri po ju shkruaj, vërtetësia e të cilit shihet tek Ai dhe te ju, sepse errësira po shkon dhe tashmë po ndriçon drita e vërtetë.
⁹ Ai që thotë se është në dritë dhe urren vëllanë e vet, ai është ende në errësirë.
¹⁰ Ai që e do vëllanë e vet, vazhdon të jetë në dritë dhe për të nuk ka shkandulli.
¹¹ Por ai që urren vëllanë e vet, është në errësirë dhe ecën në errësirë. Ai nuk e di se ku shkon, sepse errësira ia ka verbuar sytë.
¹² Po ju shkruaj juve, o bij, sepse mëkatet ju janë falur për hir të emrit të Tij.
¹³ Po ju shkruaj juve, o etër, sepse e keni njohur Atë që është që prej fillimit. Po ju shkruaj juve, o të rinj, sepse e keni mposhtur të ligun.
¹⁴ Ju kam shkruar juve, o bij, sepse e keni njohur Atin. Ju kam shkruar juve, o etër, sepse ju e keni njohur Atë që ka qenë që prej fillimit. Ju kam shkruar juve, o të rinj, sepse jeni të fortë dhe fjala e Perëndisë jeton në ju dhe ju e keni mposhtur të ligun.
¹⁵ Mos e doni botën, as ato që janë në botë. Po ta dojë dikush botën, dashuria e Atit nuk është në të.
¹⁶ Sepse gjithçka që është në botë, epshi i mishit, epshi i syve dhe mburrja për arritjet në jetë, nuk është prej Atit, por është prej botës.
¹⁷ Bota po kalon bashkë me epshet e veta, por ai që bën vullnetin e Perëndisë, mbetet përgjithmonë.
¹⁸ Bijtë e mi, kjo është ora e fundit. Siç e keni dëgjuar, antikrishti po vjen, madje tashmë kanë ardhur shumë antikrishta. Nga kjo e marrim vesh se kjo është ora e fundit.
¹⁹ Ata dolën prej nesh, por në të vërtetë nuk ishin prej tanëve; sepse po të ishin prej tanëve, do të kishin mbetur me ne, por ata shkuan që të tregohej se asnjë prej tyre nuk ishte prej tanëve.
²⁰ Por ju keni vajosjen nga I Shenjti dhe të gjithë e dini.
²¹ Nuk ju kam shkruar sepse nuk e dini të vërtetën, por sepse ju e dini atë dhe se asnjë gënjeshtër nuk vjen prej së vërtetës.
²² Kush është gënjeshtari përveç atij që mohon se Jezusi është Krishti? Ky është antikrishti, ai që mohon Atin dhe Birin.
²³ Kushdo që mohon Birin, nuk ka as Atin. Ai që pohon Birin ka edhe Atin.
²⁴ Ajo që ju vetë e keni dëgjuar që në fillim, le të mbetet te ju. Po të mbetet te ju ajo që keni dëgjuar që në fillim, edhe ju do të mbeteni te Biri dhe tek Ati.
²⁵ Ky është premtimi që na ka bërë Ai: jeta e amshuar.
²⁶ Këto jua kam shkruar për ata që përpiqen t’ju mashtrojnë.
²⁷ Sa për ju, vajosja që morët prej Tij, vazhdon të mbetet te ju dhe nuk keni nevojë t’ju mësojë njeri. Por ashtu siç ju mëson gjithçka vajosja e Tij, e cila është e vërtetë dhe nuk është gënjeshtër – pra siç ju mëson, qëndroni në Të.
²⁸ Dhe tani, o bijtë e mi, qëndroni tek Ai, që, po të shfaqet, të jemi të bindur dhe të mos kemi turp para Tij kur të vijë.
²⁹ Po ta dini që Ai është i drejtë, atëherë e dini se kushdo që zbaton atë që është e drejtë, ka lindur prej Tij.